काठमाण्डौ। लेगस्पिनर सन्दीप लामिछानेको ह्याट्रिकसहितको पाँच विकेटको बलिङ प्रदर्शनमा नेपालको क्रिकेट टोलीले अस्ट्रेलियन क्यापिटल टेरिटोरी (एसीटी)लाई पहिलो अभ्यास टी–२० खेलमा ४१ रनले पराजित गरेको छ ।
टस हारेर पहिले ब्याटिङ गरेको नेपालले २० ओभरमा ८ विकेट गुमाउँदै १७७ रन बनायो । ओपनर आसिफ शेखले ३८ बलमा ४ चौका र ५ छक्कासहित ६९ रनको दमदार प्रदर्शन गरे । कप्तान रोहित पौडेलले ३६ रन जोडे ।
१७८ रनको लक्ष्य पछ्याएको एसीटी १७.२ ओभरमै १३६ रनमा समेटियो । एसीटीका लागि जेक स्मिथले ५० रन र जाक केघले २५ रन बनाए भने काइ ब्रंकर २६ रनमा अविजित रहे ।
नेपालका लागि सन्दीप लामिछानेले ४ ओभरमा ३१ रन खर्चेर ५ विकेट हात पारे । यस क्रममा उनले ह्याट्रिक समेत पूरा गरे । करण केसीले २ विकेट लिए भने रुपेश सिंहले १ विकेट झारे ।
नेपालले आजै दोस्रो अभ्यास टी–२० खेल्नेछ । त्यसपछि टोलीले साउथ अस्ट्रेलियाविरुद्ध २ टी–२० र एक वान डे खेल्ने तालिका छ । यो सिरिजलाई आगामी विश्वकप छनोट तयारीका लागि महत्वपूर्ण मानिएको छ ।
