काठमाडौं । भोटेकोशी गाउँपालिका–५ स्थित कोलगाउँकी ११ वर्षीया एक नाबालिकामाथि बलात्कारपछि हत्या गरिएको आरोपमा सोही स्थानका पाँच युवालाई प्रहरीले पक्राउ गरी सार्वजनिक गरेको छ।

जिल्ला प्रहरी कार्यालय सिन्धुपाल्चोकका प्रमुख प्रहरी उपरीक्षक रामेश्वर कार्कीका अनुसार पक्राउ पर्नेमा २१ वर्षीय निमा तेन्जिङ तामाङ, २२ वर्षीय वाङनिमा तामाङ, ३२ वर्षीय नामग्याल शेर्पा, २० वर्षीय दावा तामाङ र २२ वर्षीय लाक्पा पासाङ तामाङ रहेका छन्। उनीहरू सबै भोटेकोशी गाउँपालिका–५ का स्थायी बासिन्दा हुन्।

बालिकाको शव असार ११ गते भोटेकोशी–५ को छ्याङ्दीस्थित जंगलमा फेला परेको थियो। घटनापछि प्रारम्भिक अनुसन्धानका आधारमा संलग्नता देखिएका पाँच जनालाई प्रहरीले नियन्त्रणमा लिएको थियो। उनीहरूलाई जिल्ला अदालतबाट सात दिनको म्याद लिएर थप अनुसन्धान भइरहेको छ।

मुलुकी अपराध संहिता २०७४ अन्तर्गत करणी र ज्यानसम्बन्धी अभियोगमा अनुसन्धान अघि बढाइएको प्रहरीले जनाएको छ। शव परीक्षणका लागि त्रिभुवन विश्वविद्यालय शिक्षण अस्पताल, काठमाडौं पठाइएको छ। साथै, आरोपितहरूका घरमा खोजतलास गर्दा घटनासँग सम्बन्धित केही प्रमाण समेत फेला परेको प्रहरीको भनाइ छ।