काठमाडौं । संयुक्त राष्ट्रसंघको ‘विकासका लागि वित्तसम्बन्धी चौथो अन्तर्राष्ट्रिय सम्मेलन’ मा सहभागी हुन नेपाली प्रतिनिधिमण्डलको नेतृत्व गर्दै प्रधानमन्त्री केपी शर्मा ओली आज स्पेन प्रस्थान गर्दै हुनुहुन्छ ।
असार १६ गतेदेखि १९ गतेसम्म हुने सम्मेलनका लागि प्रधानमन्त्री ओली आज साँझ ६ बजे कतारको दोहा हुँदै मड्रिड जान लाग्नु भएको हो । प्रधानमन्त्री नेतृत्वको टोलीमा नेपालबाट २१ सदस्यीय भ्रमण दलमा सहभागी हुने छन् ।
टोलीमा प्रथम महिला राधिका शाक्य प्रधानमन्त्रीका मुख्य सल्लाहकार विष्णुप्रसाद रिमाल, परराष्ट्र मन्त्रालयका सचिव अमृतबहादुर राई, अर्थ मन्त्रालयका सचिव घनश्याम उपाध्यायलगायत सहभागी हुने परराष्ट्र मन्त्रालयले जनाएको छ ।
भ्रमणदलमा स्पेन र न्यूयोर्कबाट ८ जना थपिनेछन् । स्पेनको सेभिल्लामा हुने ‘इन्टरनेशनल कन्फरेन्स अन फाइनान्सिङ फर डेभलपमेन्ट अफ युनाइटेड नेशन्स् (एफएफडि–४०) का लागि राष्ट्रसंघका महासचिव एन्टेनियो गुटेरस र स्पेनका प्रधानमन्त्री पेड्रो सान्चेजको मैत्रीपूर्ण निमन्त्रणमा प्रधानमन्त्री ओलीको भ्रमण हुन लागेको हो ।
भ्रमणका क्रममा प्रधानमन्त्री ओलीले स्पेनका राजा फिलिप द्वितीयसँग शिष्टाचार भेट गर्ने कार्यतालिका छ । त्यस्तै उहाँले स्पेनका समकक्षी सान्चेजसँग पनि भेटवार्ता गर्नु हुनेछ । त्यस्तै सम्मेलनका क्रममा उहाँले विश्वका अन्य मुलुकका नेताहरूसँग ‘साइडलाइन’ भेटवार्ता गर्ने कार्यक्रम तय भएको परराष्ट्र मन्त्रालयले जनाएको छ । ओली नेतृत्वको टोली आगामी शुक्रबार फर्कने तालिका छ ।
