काठमाडौं । प्रधानमन्त्री केपी शर्मा ओली आगामी शनिबार स्पेनको औपचारिक भ्रमणमा निस्कनुहुने भएको छ। उहाँ स्पेनमा आयोजना हुने विकासका लागि वित्तसम्बन्धी चौथो अन्तर्राष्ट्रिय सम्मेलनमा सहभागी हुन त्यहाँ जान लाग्नुभएको हो।
प्रधानमन्त्रीको भ्रमण असार १४ देखि २१ गतेसम्मको अवधिका लागि तय गरिएको हो, जसलाई मन्त्रिपरिषद्को असार २ गतेको बैठकले स्वीकृति दिइसकेको छ। भ्रमणअघि प्रधानमन्त्री ओली शनिबार साँझ ५ बजे त्रिभुवन अन्तर्राष्ट्रिय विमानस्थलको विशिष्ट कक्षमा सञ्चारकर्मीहरूसँग संवाद गर्नुहुनेछ।
परराष्ट्र मन्त्रालयले प्रधानमन्त्रीको भ्रमणलाई लक्षित गर्दै तयारी तीव्र पारेको छ भने स्पेनस्थित नेपाली दूतावासले पनि आन्तरिक व्यवस्थापन गरिरहेको छ। भ्रमणका क्रममा प्रधानमन्त्री ओलीले स्पेनका प्रधानमन्त्री पेड्रो सेन्चेजसँग द्विपक्षीय भेटवार्ता गर्ने कार्यक्रम तय गरिएको छ। त्यही अवसरमा दुई देशबीचको विकास साझेदारी सम्बन्धी केहि सहमति पत्रमा हस्ताक्षर हुने योजना रहेको छ।
सम्मेलनको दौरान, प्रधानमन्त्री ओलीले विभिन्न राष्ट्रका नेताहरूसँग पनि संवाद तथा छलफल गर्नुहुनेछ। साथै, उहाँले त्यहाँ रहेका नेपाली समुदायसँग पनि विशेष अन्तर्क्रिया गर्ने कार्यक्रम रहेको दूतावासले जनाएको छ।
नेपाल–स्पेन कूटनीतिक सम्बन्ध सन् १९६८ मा स्थापना भए पनि नेपालले सन् २०१८ मा मात्र स्पेनमा आफ्नै दूतावास स्थापना गरेको हो। हाल स्पेनमा अध्ययन र रोजगारीका लागि २० हजारभन्दा बढी नेपाली रहेका छन्।
स्पेनले युरोपेली संघ र आफ्नै तर्फबाट पनि नेपालका विकास, पर्यटन, संस्कृति र सामाजिक परियोजनामा लामो समयदेखि सहयोग गर्दै आएको छ। यी दुई मुलुकबीच संसदीय अभ्यासका क्षेत्रमा पनि सहकार्य भइरहेको छ।
स्पेन सरकारले युरोपियन युनियन मातहत तथा प्रत्यक्ष रूपमा पनि नेपालको विकास परियोजना, पर्यटन तथा कला संस्कृति तथा सामाजिक क्षेत्रमा लामो समयदेखि सहयोग पुर्याउँदै आएको छ। दुई देशले संसदीय अभ्यासका मामिलामा पनि सहकार्य गर्दै आएको छ।
