भेनेजुएलाकी विपक्षी नेतृ मारिया कोरीना माचाडोलाई सन् २०२५ को नोबेल शान्ति पुरस्कार प्रदान गरिएको छ। नर्वेजियन नोबेल समितिले लोकतन्त्र र मानवअधिकारको पक्षमा उनले देखाएको साहसिक नेतृत्वको प्रशंसा गर्दै यो निर्णय गरेको हो।

शुक्रबार नर्वेको राजधानी ओस्लोमा आयोजित समारोहमा समितिले माचाडोले “तानाशाहीबाट लोकतन्त्रतर्फको न्यायपूर्ण र शान्तिपूर्ण रूपान्तरणका लागि गरेको संघर्ष” लाई सम्मान स्वरूप यो वर्षको नोबेल पुरस्कार प्रदान गरिएको घोषणा गरेको हो। समितिले उनलाई “बढ्दो अन्धकारबीच लोकतन्त्रको ज्योति जलाइरहेकी नेतृ” भनेर सम्बोधन गरेको छ।

नोबेल समितिका अध्यक्षले विश्वव्यापी रूपमा अधिनायकवादको बढ्दो प्रभावप्रति चिन्ता व्यक्त गर्दै भने, “स्थायी शान्तिको पूर्वसर्त लोकतन्त्र हो, तर आजको संसारमा यो मूल्य पछाडि धकेलिँदै गएको छ।” उनले स्वतन्त्र सञ्चारमाध्यममाथिको नियन्त्रण, आलोचकहरूको दमन र राजनीतिक सैन्यकरणजस्ता प्रवृत्तिबाट विश्वभर लोकतन्त्र संकटमा परेको चेतावनी पनि दिएका छन्।

माचाडो भेनेजुएलाको प्रमुख विपक्षी नेतृ हुन्। उनलाई गत वर्षको राष्ट्रपति निर्वाचनमा उम्मेदवारी दिन निषेध गरिएको थियो — जसलाई अन्तर्राष्ट्रिय समुदायले स्वतन्त्र र निष्पक्ष नभएको भन्दै अस्वीकार गरेको थियो। त्यसपछि उनले विपक्षी उम्मेदवार एडमुन्डो गोन्जालेजको समर्थनमा देशव्यापी जनआन्दोलनको नेतृत्व गरेकी थिइन्।

उनको लोकप्रियताले शासक निकोलस माडुरोको सत्ता हल्लिएको बताइन्छ। निर्वाचनपछिका विरोध प्रदर्शनहरू सरकारी दमनमार्फत दबाइएपछि माचाडो भूमिगत जीवन बिताइरहेकी छिन्।