काठमाण्डौ – अमेरिकी राष्ट्रपति डोनाल्ड ट्रम्पले युक्रेनमा युद्धविरामका लागि रुससँग वार्तामा बस्ने अल्टिमेटम दिएका छन्। उनले रूसी राष्ट्रपति भ्लादिमिर पुटिनलाई दुई साताभित्र युक्रेनी राष्ट्रपति भोलोदिमिर जेलेन्स्कीसँग वार्ताको टेबलमा बस्न चेतावनी दिएका हुन्।
अमेरिकी टेलिभिजन सिएनएनसँगको अन्तर्वार्तामा ट्रम्पले भने, ‘दुई हप्तापछि पनि वार्ता भएन भने म ठोस निर्णय लिन्छु।’ उनले कुन पक्षमा उभिने भन्नेबारे स्पष्ट संकेत नदिए पनि ‘दुईमध्ये एउटाको पक्षमा जाने’ चेतावनी दिए।
हालसालै अलास्कामा पुटिनसँग भेटेका ट्रम्पले त्यसपछि वाशिङ्टनमा जेलेन्स्की र युरोपेली नेताहरूसँग पनि छलफल गरेका थिए। उनले युद्धविराम मात्र नभई स्थायी शान्ति आवश्यक भएको उल्लेख गर्दै पुटिन–जेलेन्स्कीबीच प्रारम्भिक वार्ता र त्यसपछि त्रिपक्षीय वार्ता गर्ने योजना अघि सारेका छन्।
तर, रूसी विदेशमन्त्री सेर्गेई लावरोभले हालसम्म पुटिन–जेलेन्स्की भेटबारे कुनै योजना नरहेको बताएका छन्। यसले वार्ताको गति फेरि सुस्त हुने संकेत गरेको छ।
ओभल अफिसमा पत्रकारहरूसँग कुरा गर्दै ट्रम्पले अलास्कामा पुटिनसँग खिचिएको तस्बिर देखाएका थिए। उनले पुटिनले सम्मानजनक व्यवहार गरेको दाबी गर्दै आगामी विश्वकपका लागि पुटिनको अमेरिकाभ्रमण पनि आगामी दुई हप्ताको घटनाक्रममा निर्भर हुने बताएका छन्
