काठमाडौं ।नेपाली सेयर बजारको सूचक नेप्से मंगलबार करिब चार वर्षपछिको उच्च बिन्दुमा पुगेको छ । अघिल्लो दिनको तुलनामा ३०.७६ अंकले वृद्धि भई नेप्से ३००२.०७ मा बन्द भएको हो । कारोबार अवधिमा एक समय नेप्से ३०२८ अंकसम्म पुगेको थियो ।
यो बिन्दु २०७८ साल भदौ १३ यताकै उच्च हो । त्यसअघि भदौ २ गते नेप्सेले हालसम्मकै कीर्तिमान ३१९८ अंक पार गरेपछि बजारमा गिरावट देखिएको थियो ।
आज कुल १८ अर्ब ५२ करोड रुपैयाँ बराबरको कारोबार भयो, जुन अघिल्लो दिनको १९ अर्ब ३६ करोडभन्दा कम हो । हालसम्म साउन ३१ गते २९ अर्ब ९५ करोड रुपैयाँ कारोबारसहित उच्चतम कारोबार दिन बनेको छ ।
आजको दिन १७६ कम्पनीको मूल्य बढ्दा ७४ कम्पनीको घट्यो । ‘अन्य’ समूहमा सबैभन्दा बढी २.५८ प्रतिशतको वृद्धि देखियो । बैंकिङ, हाइड्रोपावर, माइक्रोफाइनान्स, बीमा र लगानी समूहमा समेत उल्लेख्य वृद्धि भएको छ । यता, फाइनान्स, विकास बैंक र व्यापार समूह भने सामान्य गिरावटमा देखिए ।
चार कम्पनी मुक्तिनाथ एग्रिकल्चर, ट्रेड टावर, सान्भी इनर्जी र नाडेप लघुवित्तको मूल्य १० प्रतिशतले उक्लिएको छ । पछिल्ला दिनमा लगातार १० प्रतिशत वृद्धि गरिरहेको ट्रेड टावरको प्रतिकित्ता मूल्य ८६२.७० रुपैयाँ पुगेको छ भने सान्भी ७६९ रुपैयाँमा कारोबार भएको छ ।
नेपाल वेयरहाउजिङको ८.०६, मायाखोलाको ७.२१ तथा ग्रिन भेन्चर्सको ७ प्रतिशत मूल्य वृद्धिले बजारमा उत्साह थपेको छ । यता, समता घरेलु लघुवित्तको मूल्य ८.६ प्रतिशतले घटेको छ, जुन आजको सबैभन्दा ठूलो गिरावट हो ।
अधिक कारोबार भएका कम्पनीहरूमा हिमालयन डिस्टिलरी, ग्रिन भेन्चर्स, नेपाल पुनर्बीमा, हिमालयन रिइन्स्योरेन्स र राधि विद्युत् अग्रपंक्तिमा रहेका छन् ।
