काठमाण्डौ — नेपाल स्टक एक्सचेन्ज (नेप्से) परिसूचक सोमबार २६.२२ अंकले घटेर २,७९६.२४ विन्दुमा पुगेको छ। यस दिन नेप्से शून्य दशमलव ९२ प्रतिशतले कमजोर भएको हो।
३२३ कम्पनीका एक करोड ७६ लाख ७१ हजार ६७५ कित्ता शेयर ७८ हजार २२६ पटक किनबेच हुँदा कुल कारोबार रकम ६ अर्ब ९१ करोड ८९ लाख ८३ हजार ५०७ रुपैयाँ पुगेको नेप्सेले जनाएको छ।
क्षेत्रगत उपसूचकमा होटल तथा पर्यटन समूह मात्र १.३२ प्रतिशतले बढेको छ भने बैंकिङ ०.९४, विकास बैंक ०.७६, वित्त १.५३, जलविद्युत् १.२६, लगानी ०.६६, जीवन बीमा १.०६, उत्पादन तथा प्रशोधन १, लघुवित्त १.४९, म्युचुअल फन्ड ०.२४, निर्जीवन बीमा ०.८१, व्यापार ०.८६ र अन्य समूह ०.६२ प्रतिशतले घटेका छन्।
व्यक्तिगत कम्पनीतर्फ सिटी होटल लिमिटेडको शेयरमा सकारात्मक सर्किट लाग्दा सिक्लेस हाइड्रोपावर लिमिटेडको शेयरमा नकारात्मक सर्किट लागेको छ। कारोबार रकमका आधारमा नेपाल रिइन्स्योरेन्स कम्पनी लिमिटेड शीर्ष स्थानमा रह्यो, जसको २६ करोड ७७ लाख ५५ हजार २९३ रुपैयाँ बराबरको शेयर किनबेच भयो। कारोबार भएका शेयर सङ्ख्यामा भने सिद्धार्थ इक्विटी फन्ड अगाडि रह्यो, जसको ६ लाख ६ हजार ३१७ कित्ता शेयर कारोबार भयो।
