काठमाडौँ । प्रधानमन्त्री तथा एमाले अध्यक्ष केपी शर्मा ओलीले काठमाडौंमा बागमती प्रदेशका नेता, केन्द्रीय सदस्य र विधान महाधिवेशन प्रतिनिधिलाई प्रशिक्षणात्मक निर्देशन दिएका छन्।
बुधबार साँझ बालुवाटारमा बसेको कार्यक्रममा उनले आफू र पार्टीको निर्णयको पक्षमा उभिन नेताहरुलाई आह्वान गरेका थिए। जिल्ला कमिटी अध्यक्ष दीपक निरौलाले ओलीको भनाइलाई ४८ बुँदामा सार्वजनिक गरेका छन्। उनका अनुसार ओलीको अधिकांश मन्तव्य पूर्वराष्ट्रपति विद्यादेवी भण्डारी र उनको पक्षधर नेतामाथि लक्षित थियो।
ओलीले २०५४ सालदेखि पार्टीले पार गरेका उतारचढावको स्मरण गर्दै अहिलेको अवस्थासम्म ल्याउन धेरै संघर्ष भएको बताए। उनले भण्डारीलाई एमाले नेतृत्व गर्न योग्य नभएको स्पष्ट पार्दै, “राष्ट्रपति भइसकेको व्यक्तिले अशोभनीय गतिविधि गर्नुहुँदैन,” भन्दै आलोचना गरेका थिए।
उनले भण्डारीलाई कतिपय नेताले उचालिरहेको दाबी गर्दै पार्टी फुटाउने गतिविधि स्वीकार्य नहुने चेतावनी दिएका थिए। साथै, विधान महाधिवेशन एकताको अधिवेशन हुने भन्दै फरक मत राख्न नहुने प्रष्ट पारे।
कार्यकाल र उमेर हदबारे पनि ओलीले प्रतिक्रिया दिँदै भने, “साथीहरूको चाहना र समयको मागअनुसार मेरो कार्यकाल र ७० वर्षको सीमा आवश्यक छैन।” उनले आफू स्वस्थ भएकाले निरन्तर नेतृत्व गर्न सक्ने सन्देश दिएका थिए।
बालुवाटार ब्रिफिङमा ओलीले रवि लामिछाने र राजेन्द्र लिङ्देनसमेतको प्रसंग निकाल्दै आफ्नो सहयोगमा उनीहरू अघि बढेको दाबी गरे। राष्ट्रियताबारे अडान दोहोर्याउँदै उनले यस विषयलाई राजनीतिक लाभको माध्यम नबनाउन आग्रह गरे।
