काठमाण्डौ । राष्ट्रिय स्वतन्त्र पार्टी (रास्वपा) को सचिवालय बैठक आज चःमतीस्थित केन्द्रीय कार्यालयमा बसेको छ। बैठकमा चारवटा मुख्य कार्यसूचीबारे छलफल भइरहेको प्रवक्ता मनिष झाले जानकारी दिए।
उनका अनुसार बैठकमा समसामयिक राजनीतिक अवस्था र पार्टी गतिविधि, सभापति रवि लामिछानेको समर्थनमा भइरहेको हस्ताक्षर अभियान, पार्टी प्रशिक्षण कार्यक्रम तथा संगठनात्मक क्रियाकलापबारे विस्तृत बहस भइरहेको छ। साथै, विभिन्न विभागहरू—केन्द्रीय संगठन, प्रशिक्षण, अभियान तथा प्रचारप्रसार र प्रवास नेपाली सम्पर्क विभागको कार्यप्रगतिबारे पनि समीक्षा भइरहेको उनले बताए।
बैठकमा प्रदेश इन्चार्जहरूको कार्यसम्पादन मूल्यांकनसँगै रूपन्देही-३ उपनिर्वाचनका लागि उम्मेदवार छनोट विधिबारे पनि छलफल जारी छ। उक्त क्षेत्रमा नौजनाले उम्मेदवारी दाबी गरेका छन्। पार्टीले लिडरसिप एकेडेमीमार्फत अभ्यास गरिरहेको छ भने अन्तिम नाम प्रारम्भिक निर्वाचनमार्फत तय गरिने प्रवक्ता झाले स्पष्ट गरे।
त्यससँगै वडा परिषद्, पालिका परिषद् र जिल्ला अधिवेशनसम्बन्धी कार्यविधि र विशेषज्ञहरूलाई समावेश गर्ने विषय पनि एजेन्डामा समेटिएको छ।
यसैबीच, केन्द्रीय सदस्य चन्दा कार्कीले भिजिट भिसा प्रकरणमा संलग्नताको आरोपबारे गठित छानबिन समितिको प्रतिवेदन कार्यवाहक सभापति डोलप्रसाद अर्याललाई बुझाएकी छन्।
