काठमाडौं । नेपाली कांग्रेसका वरिष्ठ नेता डा. शेखर कोइरालाले संसदमा सर्वसम्मतिबाट पेश भएको निजामती सेवा विधेयकमा अनधिकृत संशोधनप्रति कडा आपत्ति जनाएका छन्।
सामाजिक सञ्जालमार्फत आफ्नो धारणा राख्दै उनले विधेयकमा गरिएको फेरबदललाई संविधान र कानुनी प्रक्रिया विपरीत भएको भन्दै गम्भीर आपत्ति जनाएका हुन्।
डा. कोइरालाका अनुसार, संसदको निर्णयलाई बेवास्ता गर्दै गरिएको यस्तो संशोधन देश, जनता र संसदकै अपमान हो। उनले दोषीलाई तत्काल कानुनी कारबाहीमा ल्याउन र विधेयकलाई पूर्ववत् अवस्थामा फर्काउन सरकारसँग माग गरेका छन्।
उनले स्पष्ट रूपमा भनेका छन्— “कुलिङ पिरियड नराखी विधेयकको कार्यान्वयन अघि बढ्न सक्दैन र बढ्दैन पनि।”
उनको यो कडा प्रतिक्रिया पछि विवादमा रहेको निजामती सेवा विधेयक नयाँ चरणमा प्रवेश गरेको छ। अब सत्ता पक्षको जवाफ र अगाडि उठ्ने कदमलाई लिएर चासो बढेको छ।
