काठमाडौं । सभामुख देवराज घिमिरेले संसद्मा जारी अवरोधबारे रास्वपाका कार्यवाहक सभापति डीपी अर्याल र राप्रपा अध्यक्ष राजेन्द्र लिङ्देनसँग छुट्टा छुट्टै छलफल गरेका छन् ।
अर्यालसँगको छलफलमा सभामुखले संवैधानिक सीमाका कारण बजेटमाथिको छलफल सुरु गर्नैपर्ने बाध्यता रहेको भन्दै संसद अवरोधको स्वरुप बदल्न आग्रह गरेका थिए । सभामुखले सदनलाई मर्यादित बनाउनसमेत अर्यालको ध्यानाकर्षण गराएको सभामुखको सचिवालयले जनाएको छ ।
जवाफमा अर्यालले आफूहरूको अवरोध जारी रहने बताउँदै संसद्लाई मर्यादित बनाउने प्रतिबद्धता जनाएका थिए । गत शुक्रबारको बैठकमा अवरोधका क्रममा संसदीय मर्यादाविपरीतका गतिवधि भएकोबारे बिहान भएको बैठकमा प्रमुख सचेतकहरूले सभामुखको ध्यानाकर्षण गराएका थिए । त्यसपछि सभामुखले विरोधमा रहेका दलका नेताहरुलाई छलफलका लागि बोलाएका हुन् ।
सभामुखले अध्यक्ष लिङ्देनलाई पनि संवैधानिक बाध्यता बुझिदिन आग्रह गर्दै संसद्को अवरोध हटाउन आग्रह गरेका थिए । अध्यक्ष लिङ्देनसँग टेलिफोन गर्दै सभामुखले संसदमा आफ्ना विषयलाई राखेर सदन चल्ने वातावरण बनाउन सहयोग गर्न आग्रह गरेका छन् । लिङदेनले संसद प्रतिपक्षीदहरुको भएको भन्दै सत्तापक्षले प्रतिपक्षको भावना बुझ्न नसकेको जवाफ दिएका थिए ।
