काठमाण्डौ । त्रिभुवन विश्वविद्यालयका उपकुलपति प्रा. डा. दीपक अर्यालले विश्वविद्यालयअन्तर्गतका विभिन्न क्याम्पस र कार्यालयमा रहेका पुस्तकालयलाई विद्युतीकरण गर्ने योजना अघि बढाइएको बताउनुभएको छ ।
१८औं पुस्तकालय दिवसका अवसरमा त्रिवि केन्द्रीय पुस्तकालयले शुक्रबार आयोजना गरेको कार्यक्रममा उपकुलपति अर्यालले पुस्तकालयलाई प्रविधिमैत्री बनाउनुपर्ने आवश्यकता औंल्याउँदै अध्ययन, अनुसन्धान र प्रकाशनमा पुस्तकालयको महत्त्वपूर्ण भूमिका रहेको उल्लेख गर्नुभयो ।
कार्यक्रममा विज्ञान तथा प्रविधि अध्ययन संस्थानका पूर्वडिन प्रा. डा. विनिल अर्यालले नेपालमा अनुसन्धान प्रकाशनको अवस्था, नेपाली तथा अन्तर्राष्ट्रिय जर्नलको तुलनात्मक समीक्षा प्रस्तुत गर्नुभयो । यस्तै, मानवशास्त्र केन्द्रीय विभागका सहप्राध्यापक डा. मनबहादुर खत्री र पोटेन्ट मिडिया होमका कार्यकारी निर्देशक सुरेश रिजालले पनि कार्यपत्र प्रस्तुत गर्नुभएको थियो ।
