काठमाण्डौ । लगातारको वर्षाले देशका विभिन्न भागमा बाढीपहिरो उत्पन्न भई नौवटा राजमार्ग पूर्णरूपमा अवरुद्ध भएका छन् । प्रहरी प्रधान कार्यालयका अनुसार सङ्खुवासभाको भोटखोलास्थित कोशी राजमार्ग, रसुवाको नेपाल–चीन जोड्ने पुल, रसुवाकै पासाङल्हामु राजमार्ग, सिन्धुपाल्चोकको अरनिको राजमार्ग, बागलुङको कालीगण्डकी करिडोर, म्याग्दीको बेनी–दरबाङ सडक, रुकुमपश्चिमको जाजरकोट सडक, डोल्पाको भेरी करिडोर तथा दार्चुलाको गोकुलेश्वर–दार्चुला सडकखण्ड पूर्णरूपमा बन्द भएका हुन् ।

त्यस्तै, तेह्रथुमको मध्यपहाडी लोकमार्ग, रसुवाको उत्तरगया खण्ड, पासाङल्हामु राजमार्ग र पृथ्वी राजमार्ग एकतर्फी सञ्चालन भइरहेको छ । साथै, नवलपरासीपूर्वको कालीगण्डकी करिडोर, तनहुँको पृथ्वी राजमार्ग, दाङको राप्ती राजमार्ग र अर्घाखाँचीको सालझण्डी–ढोरपाटन सडकखण्ड पनि एकतर्फी मात्र सञ्चालनमा रहेको समाचार कक्षले जनाएको छ ।

यातायात अवरुद्ध हुँदा प्रभावित क्षेत्रमा आवागमन ठप्प भएको छ भने सर्वसाधारण मारमा परेका छन् ।