काठमाण्डौ । प्रधानमन्त्री केपी शर्मा ओली शनिबार बिहान चीन प्रस्थान गर्नुभएको छ । उहाँ सांघाई सहयोग संगठन (एससीओ) को २५औं शिखर सम्मेलन तथा ‘एससीओ प्लस’ बैठकमा सहभागी हुन त्रिभुवन अन्तर्राष्ट्रिय विमानस्थलबाट प्रस्थान गर्नुभएको हो । चीनको तियानजिन सहरमा भदौ १५–१६ गतेसम्म सम्मेलन आयोजना हुँदैछ, जहाँ नेपाल ‘डायलग पार्टनर’ का हैसियतमा सहभागी हुने भएको छ ।

प्रधानमन्त्री ओलीले ‘एससीओ प्लस’ बैठकलाई सम्बोधन गर्नुका साथै चिनियाँ राष्ट्रपति सी चिनफिङ र भारतीय प्रधानमन्त्री नरेन्द्र मोदीसँग उच्चस्तरीय भेटवार्ता गर्ने तय भएको छ । गत साता भारत र चीनबीच लिपुलेक हुँदै व्यापार पुनः सञ्चालन गर्ने सहमति भएपछि ओलीको चीन भ्रमण विशेष महत्वका साथ हेरिएको छ । नेपालले उक्त सहमतिप्रति औपचारिक आपत्ति जनाइसकेको कारण यी भेटवार्ताप्रति सर्वत्र चासो देखिएको छ ।

परराष्ट्र मन्त्रालयले जारी गरेको विज्ञप्तिअनुसार प्रधानमन्त्री ओलीले सम्मेलनका अवसरमा सहभागी अन्य मुलुकका नेताहरूसँग पनि साइडलाइन भेट गर्नेछन् । साथै, १७ भदौमा उहाँले बेइजिङमा चीनका उपराष्ट्रपति हान चङसँग पनि भेटवार्ता गर्ने कार्यक्रम छ । प्रधानमन्त्री भएपछिको यो ओलीको दोस्रो चीन भ्रमण हो ।