काठमाडौँ । अर्थमन्त्री सुनिल कुमार यादवको राजीनामा माग गर्दै प्रतिपक्षी दलहरूले अवरोध जारी राखेपछि मधेश प्रदेश सभाको बैठक अनिश्चितकालका लागि स्थगित गरिएको छ । सभामुख रामचन्द्र मण्डलले शुक्रबारको बैठक अवरोधकै कारण अर्को सूचना नआएसम्मका लागि स्थगित गर्ने घोषणा गरेका हुन् ।
नेकपा (माओवादी केन्द्र) का प्रमुख सचेतक जवाहरलाल कुशवाहाले त्रुटिपूर्ण र बिचौलियामुखी बजेट ल्याएको भन्दै अर्थमन्त्री यादवको राजीनामा माग गरेका थिए । राजीनामा नआएसम्म सदन अवरोध जारी रहने उनको चेतावनी छ ।
नेपाली कांग्रेसका प्रमुख सचेतक कुमारकान्त झाले प्रतिपक्षी दलहरूले सर्वदलीय बैठकमा भाग नलिएर सदनमै अवरोध गर्ने प्रवृत्तिको आलोचना गरेका छन् । तर विपक्षी दलहरूले सभामुखले तटस्थता नअपनाएको आरोप लगाउँदै आन्दोलन चर्काएका छन् ।
मधेश प्रदेश सरकारले प्रस्तुत गरेको आर्थिक वर्ष २०८२/८३ को बजेटलाई त्रुटिपूर्ण र बिचौलियाको प्रभावमा पास गरिएको भन्दै प्रतिपक्षी दलहरू असन्तुष्ट छन् । जसपा नेपाल, नेकपा माओवादी केन्द्र, नेकपा एकीकृत समाजवादी, नेपाल संघीय समाजवादी पार्टी, राप्रपा नेपाल र नागरिक उन्मुक्ति पार्टीले सदन अवरोध गर्दै आएका छन् ।
यसअघि बिहीबारको बैठक पनि अवरोधकै कारण सञ्चालन हुन सकेको थिएन ।
