काठमाडौँ, भदौ १३ । प्रधानमन्त्री एवम् नेकपा (एमाले) अध्यक्ष केपी शर्मा ओली नेतृत्वको नेपाली प्रतिनिधिमण्डल भोलि भदौ १४ गतेदेखि १८ गतेसम्म (सन् २०२५ अगष्ट ३० देखि सेप्टेम्बर ३) चीनको पाँचदिने औपचारिक भ्रमणमा प्रस्थान गर्ने भएको छ ।
प्रतिनिधिसभाको शुक्रबारको बैठकमा आसन्न भ्रमणबारे जानकारी दिँदै प्रधानमन्त्री ओलीले भ्रमणको प्रमुख उद्देश्य चीनको थियानजिन शहरमा हुने साङ्घाई सहयोग सङ्गठन (एससिओ) शिखर सम्मेलनमा भाग लिनु रहेको स्पष्ट गरे । सन् २०१६ देखि नेपाल यस संगठनको संवाद साझेदार राष्ट्रका रूपमा सक्रिय रहँदै आएको छ ।
भ्रमणका क्रममा प्रधानमन्त्री ओलीले चीनका राष्ट्रपति सी चिनफिङ र उपराष्ट्रपति हान चङ्गसँग छुट्टाछुट्टै भेटवार्ता गर्नेछन् । साथै, रूसका राष्ट्रपति भ्लादिमिर पुटिन, माल्दिभ्सका राष्ट्रपति डा. मोहमद मिज्जु, कम्बोडियाका प्रधानमन्त्री डा. सोमदेक मोहा बोरभोर तिपाहदे हुन महानेट, लाओसका प्रधानमन्त्री सोनेसाइ सिपानडोन र भियतनामका प्रधानमन्त्री फाम मिन चिङसँग द्विपक्षीय भेट तय भइसकेको छ ।
यसैगरी, नेपाली प्रतिनिधिमण्डलले बेइजिङमा आयोजना हुने फासिवादविरुद्धको विश्वयुद्ध र जापानी अतिक्रमणविरुद्धको प्रतिरोधी युद्धको ८०औँ विजय दिवस समारोहमा पनि सहभागी हुने कार्यक्रम छ । सो समारोहमा ५० भन्दा बढी मुलुकका प्रतिनिधिमण्डल सहभागी हुनेछन् ।
प्रधानमन्त्री ओलीले भ्रमणले नेपाल–चीन सम्बन्धलाई थप प्रगाढ बनाउने र एससिओ सम्मेलनमा सहभागितामार्फत नेपालको अन्तर्राष्ट्रिय छवि र भूमिका अझ प्रबल हुने विश्वास व्यक्त गरे ।
भ्रमण दलमा प्रधानमन्त्रीकी धर्मपत्नी राधिका शाक्य, पूर्व उपप्रधानमन्त्री पूर्णबहादुर खड्का, शिक्षा, विज्ञान तथा प्रविधि मन्त्री रघुजी पन्त, संस्कृति, पर्यटन तथा नागरिक उड्डयन मन्त्री बद्रीप्रसाद पाण्डे, पूर्वमन्त्री एवं प्रधानमन्त्रीका आर्थिक तथा विकास सल्लाहकार डा. युवराज खतिवडा, पूर्वमन्त्री तथा सांसद छविलाल विश्वकर्मालगायत उच्च अधिकारीहरू सहभागी हुनेछन् ।
