काठमाडौँ । संघीय मामिला तथा सामान्य प्रशासन मन्त्रालयले देशभरका सबै स्थानीय तहमा प्रमुख प्रशासकीय अधिकृत खटाएको छ । यससँगै अब कुनै पनि नगरपालिका वा गाउँपालिका निमित्त प्रमुख प्रशासकीय अधिकृतको भरमा सञ्चालन हुने छैनन् ।
मन्त्री भगवती न्यौपानेले सामाजिक सञ्जालमार्फत जानकारी दिँदै देशभरका दुई सय पालिकामा प्रमुख प्रशासकीय अधिकृत खटाइएको बताएकी छन् ।
उनका अनुसार, आफूले मन्त्रालयको कार्यभार सम्हाल्दा देशभरका ७५३ मध्ये करिब २०० स्थानीय तह निमित्त अधिकृतको भरमा सञ्चालन भइरहेका थिए । ‘आजबाट देशभरीका गाउँपालिका र नगरपालिकालाई निमित्तविहीन बनाइएको छ,’ मन्त्री न्यौपानेले लेखेकी छन् ।
उनले कर्मचारी प्रशासनलाई सुशासनको मुख्य औजारका रूपमा लिएर सुधार र परिमार्जनको निरन्तर प्रयास भइरहेको पनि उल्लेख गरिन् । मन्त्री बनेपछि सबै पालिकामा स्थायी प्रमुख प्रशासकीय अधिकृत खटाउने घोषणा गरेको स्मरण गर्दै उनले उक्त प्रतिबद्धता कार्यान्वयन भएको दाबी गरिन् ।
‘स्थानीय तहलाई निमित्त अधिकृतको भरमा चलाउने प्रवृत्ति अन्त्य गर्नुपर्छ भन्ने दृढताका साथ निर्णय गरिएको हो,’ मन्त्री न्यौपानेले भनिन्, ‘जिम्मेवारी पाउने सबै कर्मचारी मित्रलाई बधाई छ ।’
