काठमाडौँ । पोखरा अन्तरराष्ट्रिय विमानस्थलमार्फत अष्ट्रेलिया उडान हुने भएको छ। चीनको सिचुवान एयरलाइन्सले छेन्दु हुँदै अष्ट्रेलिया जाने उडानका लागि नेपाल नागरिक उड्डयन प्राधिकरणसँग अनुमति मागेको छ।
प्राधिकरणका सूचना अधिकारी ज्ञानेन्द्र भूलका अनुसार उडानका लागि अनौपचारिक छलफल भइसकेको छ र प्रक्रिया पूरा भएपछि अनुमति दिइनेछ। कम्पनीले आगामी सेप्टेम्बरदेखि नियमित उडान सुरु गर्ने योजना बनाएको छ। यसअघि सिचुवान एयरलाइन्सले पोखराबाट चार्टर्ड उडान गरिसकेको थियो।
यस्तै, भुटान एयरलाइन्स (टासी) ले पनि पोखराबाट पारो अन्तर्राष्ट्रिय विमानस्थलसम्मका लागि चार्टर्ड उडान अनुमति मागेको छ। आगामी सेप्टेम्बर २८ र अक्टोबरमा चार दिन यात्रु उडान गर्ने योजना रहेको छ। प्राधिकरणका अनुसार दिगो देखिए नियमित उडानमा पनि विस्तार हुनेछ।
हाल पोखरामा हिमालय एयरलाइन्सले मात्र नियमित उडान गरिरहेको छ। हिमालयले हप्तामा एक दिन काठमाडौं–ल्हासा–पोखरा–ल्हासा–काठमाडौं उडान सञ्चालन गर्दै आएको छ। सिचुवान र भुटान एयरलाइन्स थपिएपछि विमानस्थल चलायमान हुने विश्वास लिइएको छ।
उता, भैरहवास्थित गौतमबुद्ध विमानस्थलबाट पनि जजिरा एयर र थाई एयर एसियाले पुनः उडान सुरु गर्ने तयारी गरेका छन्। दुवै कम्पनीले विन्टर ‘सेडुअल’ भित्र नियमित उडान गर्ने योजना बनाएका छन्।
सरकारले पोखरा र भैरहवाबाट अन्तर्राष्ट्रिय उडान प्रोत्साहन गर्न शुल्कमा आकर्षक छुटको व्यवस्था गरेको छ। पार्किङ, ल्यान्डिङ र न्याभिगेसन शुल्क पूर्ण छुट दिइएको छ भने नेपाल एयरलाइन्सको ‘ग्राउन्ड ह्यान्डलिङ’ सेवामा ७५ प्रतिशतसम्म छुट गरिएको छ।
यी सहुलियतले दुवै विमानस्थलमा विदेशी वायुसेवाको आकर्षण बढ्ने प्राधिकरणले आशा गरेको छ।
