काठमाडौँ, भदौ १२ गते । सरकारले ‘राष्ट्रिय युवा नीति–२०८२’ स्वीकृत गर्दै युवाको उमेर १८ देखि ३५ वर्षसम्म कायम गर्ने निर्णय गरेको छ। यसअघि २०७२ को युवा नीतिअनुसार १६ देखि ४० वर्षसम्मलाई युवा मानिएको थियो।
राष्ट्रिय युवा परिषद्का कार्यकारी उपाध्यक्ष सुरेन्द्र बस्नेतका अनुसार नयाँ नीतिमा नेपालको सन्दर्भ र अन्तर्राष्ट्रिय अभ्यासलाई ध्यानमा राखी १८–३५ उमेर समूहलाई युवा वर्गमा परिभाषित गरिएको हो। उनका अनुसार बालबालिकासम्बन्धी ऐनले १८ वर्षसम्मलाई बालबालिका मानेकाले त्यसपछि मात्रै युवाको आयु समूह सुरु हुने प्रावधान राखिएको हो।
२०७८ सालको जनगणना अनुसार १६–४० वर्ष समूहको जनसङ्ख्या ४२.५६ प्रतिशत थियो। अब नयाँ नीतिअनुसार नयाँ जनसङ्ख्याको आधार छुट्टै निकाल्न परिषद्ले आग्रह गरेको छ।
संयुक्त राष्ट्रसंघले १५–२४ वर्षलाई युवा भनेपनि भारतले पनि यही आयु समूहलाई अपनाउँदै आएको छ। नेपालमा भने कानुनी रूपमा अझै ‘युवा परिषद् ऐन–२०७२’ अनुसार १६–४० वर्ष कायम रहेको र ऐन संशोधन नगरेसम्म त्यही लागू हुने बस्नेतले स्पष्ट पारे।
प्रत्येक पाँच वर्षमा युवा नीति परिमार्जन गर्नुपर्ने भए पनि यसपटक १० वर्षपछि संशोधन गरिएको हो।
