काठमाण्डौ । गृह मन्त्रालयले नागरिकलाई सहज र पहुँचयुक्त सेवा उपलब्ध गराउन देशभर थप २३ वटा इलाका प्रशासन कार्यालय स्थापना गर्ने तयारी अन्तिम चरणमा पुर्‍याएको छ। मन्त्रालयले जिल्ला सदरमुकाममै सीमित रहेको सेवा प्रवाहलाई विस्तार गर्दै दुर्गम क्षेत्रमा पनि सेवा सहज बनाउन यो योजना अघि बढाएको हो।

गृह मन्त्रालयका सहप्रवक्ता रवीन्द्र आचार्यका अनुसार सरकारको नीति तथा कार्यक्रमअनुसार इलाका प्रशासन कार्यालय थपका लागि कार्ययोजना तयार पारेर प्रस्ताव प्रधानमन्त्री तथा मन्त्रिपरिषद् अन्तर्गतको प्रशासन समितिमा पठाइएको छ।

उनका अनुसार, नयाँ इलाका प्रशासन कार्यालयमार्फत सिडिओलाई तोकिएको जिम्मेवारीबाहेक अन्य सबै सेवाहरू उपलब्ध गराइनेछन्। कुन जिल्लामा कार्यालय थप्ने भन्ने विषय भौगोलिक अवस्था र जनसंख्या आधारमा सर्वेक्षणपछि तय गरिनेछ।

गृह मन्त्रालयले यसअघि गरेको सङ्गठन तथा व्यवस्थापन सर्वेक्षणमा पनि २३ कार्यालय थप्ने प्रस्ताव गरिएको थियो। सोमबार सो प्रस्ताव मन्त्रिपरिषद्को प्रशासन समितिमा पठाइएको हो। गृहमन्त्री रमेश लेखकले तराईदेखि उच्च हिमालसम्म सेवा सहज बनाउन संरचनागत सुधारलाई प्राथमिकतामा राख्दै पहल अघि बढाएका छन्।

नागरिकतासहित विभिन्न प्रशासनिक सेवाका लागि नागरिकलाई लामो दूरी यात्रा गर्नुपर्ने बाध्यता अन्त्य गर्ने उद्देश्यले यो कदम चालिएको मन्त्रालयले जनाएको छ। यसका लागि आन्तरिक स्रोत परिचालन गरी नयाँ कार्यालय स्थापना र दरबन्दी हेरफेर गरिने तयारी भइरहेको छ।