काठमाण्डौ । अमेरिकी राष्ट्रपति डोनाल्ड ट्रम्पले गाजा युद्धपछिको व्यवस्थापनबारे ‘व्यापक योजना’ प्रस्तुत गर्न ह्वाइट हाउसमा आज ठूलो बैठक बोलाएका छन्। अमेरिकी विशेष दूत स्टिभ विटकफका अनुसार, यो पहिलो पटक हो जब उक्त योजनाको अस्तित्व सार्वजनिक गरिँदैछ।
विटकफले फक्स न्युजलाई दिएको अन्तर्वार्तामा भने, “धेरैले यो योजनाको बलियो पक्ष र यसको मानवीय उद्देश्य मूल्याङ्कन गर्नेछन्। यसले राष्ट्रपति ट्रम्पको दृष्टिकोणलाई प्रतिबिम्बित गर्छ।”
उहाँले युद्धविराम सम्झौताबारे प्रशासनको आधिकारिक धारणा दोहोर्याउँदै आंशिक गाजा बन्धक सम्झौताविरुद्ध रहेको स्पष्ट गरे। यसअघि, हमासले अगस्ट १८ मा अरब मध्यस्थकर्ताको प्रस्ताव स्वीकार गरेको थियो। तर ट्रम्पले ट्रुथ सोसलमा पोस्ट गर्दै “हमास पूर्णरूपमा ध्वस्त भएपछि मात्र बन्धक मुक्त गर्नुपर्छ” भन्ने धारणा व्यक्त गरेका थिए।
यद्यपि ह्वाइट हाउसले पछिल्लो चरणबद्ध बन्धक सम्झौता प्रस्तावको समीक्षा गरिरहेको टाइम्स अफ इजरायलले उल्लेख गरेको छ। विटकफका अनुसार, हमासले प्रक्रिया ढिलो पार्न खोजेको र इजरायली दबाबपछि मात्रै प्रस्ताव स्वीकार गरेको हो। तर इजरायलले सम्झौता स्वीकार गर्ने वा नगर्ने विषयमा कुनै टिप्पणी भएको छैन।
इजरायलले हाल गाजामा स्थलगत अभियान चलाइरहेको छ, जसको उद्देश्य हमासलाई पूर्णरूपमा ध्वस्त पार्ने रहेको बताइएको छ। पछिल्ला आक्रमणमा कम्तीमा ६१ जनाको मृत्यु भएको छ, जसमा सहायता खोज्ने सात जना पनि छन्। गाजाको नागरिक सुरक्षाका अनुसार, अगस्ट ६ देखि इजरायलले गाजा सहरमा एक हजारभन्दा बढी भवन ध्वस्त पारेको छ, जसका कारण उद्धार र सहायता कार्यमा गम्भीर अवरोध भइरहेको छ।
