काठमाण्डौ । बुधबार सेयर बजारमा उल्लेख्य वृद्धि भएको छ। अघिल्लो दिनको तुलनामा नेप्से परिसूचक ५३.०१ अंकले बढेर २८१९ मा पुगेको छ।
बजार खुल्दा केही समय घटे पनि सवा ११ बजेतिर २७६८ अंकमा पुगेपछि सूचकमा आएको वृद्धि अन्तिमसम्म कायम रह्यो। कारोबार रकम पनि उल्लेख्य रूपमा बढेको छ। अघिल्लो दिन ४ अर्ब १८ करोडको कारोबार भएकोमा आज ७ अर्ब ६८ करोडको कारोबार भएको हो।
२३२ कम्पनीको मूल्य बढ्दा १९ को घट्यो। सबै समूहका सूचक बढेका छन्। विकास बैंक समूह सर्वाधिक ३.४० प्रतिशतले उकालो लाग्यो। बैंकिङ १.३८, फाइनान्स १.९८, होटल तथा पर्यटन १.६६, हाइड्रोपावर १.८५, लगानी २.१९, जीवन बीमा २.२१, उत्पादन तथा प्रशोधन २.६९, माइक्रोफाइनान्स १.०९, निर्जीवन बीमा १.६८, अन्य २.१४ र व्यापार समूह २.६८ प्रतिशतले बढे।
विकास हाइड्रोपावरको मूल्य सबैभन्दा धेरै १० प्रतिशतले बढ्यो। त्यसपछि समता घरेलु लघुवित्त ९.३६, ग्रिन भेन्चर्स ८.०८, क्रेस्ट माइक्रोलाइफ इन्स्योरेन्स ७.६०, गार्डियन माइक्रोलाइफ इन्स्योरेन्स ७.२८, नेपाल माइक्रो इन्स्योरेन्स ५.५३ र लुम्बिनी विकास बैंक ५.२३ प्रतिशतले बढे।
यता, नेपाल रिपब्लिक मिडियाको मूल्य ४.२९ प्रतिशत घटेर सबैभन्दा बढी घाटामा रह्यो। सीवाईसी लघुवित्त ३.०५ र नारायणी डेभलपमेन्ट बैंक २.०७ प्रतिशतले घटे।
आज धेरै कारोबार भएका कम्पनीमा हिमालयन रिइन्स्योरेन्स, नेपाल पुनर्बीमा, ग्रिन भेन्चर्स, हिमालयन डिस्टिलरी र नेपाल रिपब्लिक मिडिया रहेका छन्।
