काठमाण्डौ। जलवायु परिवर्तनको गम्भीर असरबारे राष्ट्रिय बहस गराउन मुस्ताङको घरपझोङ गाउँपालिकाले अनौठो पहल गर्न लागेको छ । गाउँपालिकाले भदौ ३१ गते देशभरका स्थानीय तहका प्रमुखलाई सहभागी गराई एकदिने राष्ट्रिय सम्मेलन आयोजना गर्ने तयारी गरेको हो ।
गाउँपालिकाका अध्यक्ष मोहनसिंह लालचनका अनुसार सम्मेलनमा ७५३ वटै स्थानीय तहका प्रमुखलाई निमन्त्रणा गरिएको छ । “उहाँहरूले आ–आफ्नो पालिकामा जलवायु परिवर्तनले पारेका असरबारे कार्यपत्रसहित आउनुहुनेछ,” उनले बताए ।
स्थानीय तहहरूले तयारी पनि सुरु गरिसकेका छन् । सोलुखुम्बु, मोरङ र दाङका प्रमुखहरूले हिमालमा हिउँ नपर्ने, वर्षामा पानी नपर्ने वा एकैपटक बढी वर्षा हुने, बाढीपहिरो र नयाँ रोगहरू बढ्ने जस्ता समस्या देखिएको बताएका छन् ।
गाउँपालिकाका अध्यक्ष लालचनले “हामीले नगरेको गल्तीको असर भोग्दैछौँ, पानीका मूल सुक्दैछन्, पर्यटन र कृषि संकटमा छन्,” भन्दै सम्मेलनमार्फत मुस्ताङ घोषणापत्र तयार गरी संघ, प्रदेश र स्थानीय सरकारलाई दबाब दिने बताए ।
सम्मेलनमा स्थानीय सरकारका प्रमुखसँगै जलवायु विज्ञ र विषय विशेषज्ञ सहभागी हुनेछन् । करिब २,५०० सहभागी हुने अनुमान छ र करिब ६० लाख खर्च हुने जनाइएको छ ।
