काठमाण्डौ । वीरगन्ज महानगर क्षेत्रमा शुक्रबारदेखि सुरु भएको हैजाको प्रकोप नियन्त्रणमा आउन सकेको छैन । सोमबार साँझसम्म महानगरका विभिन्न अस्पतालमा झाडापखाला तथा हैजाका १६६ बिरामी उपचाररत छन् । तीमध्ये ९३ जनामा हैजा पुष्टि भएको स्वास्थ्य अधिकारीहरूले जनाएका छन् ।
संक्रमितहरू वीरगन्ज महानगरका वडा नं. ३, ११, १२, १३ र १६ का बासिन्दा हुन् । नारायणी र तराई अस्पतालमा ३२/३२ जना, नेसनल मेडिकल कलेजमा १२ जना तथा अन्य विभिन्न अस्पतालमा पनि संक्रमित उपचाररत छन् ।
प्रकोपको सुरुवात शुक्रबार वीरगन्ज–१२ मुर्ली टोलमा एकैपटक ३० जना झाडापखाला बिरामी अस्पताल भर्ना भएपछि भएको हो । सोही दिन गरिएको परीक्षणमा तीन जनामा हैजाको जीवाणु फेला परेपछि स्वास्थ्यकर्मीहरू प्रभावित बस्तीमा खटिएका थिए ।
संक्रमण फैलनुको कारण अझै खुलेको छैन । पानीबाट रोग फैलिएको आशंकामा खानेपानी नमुना संकलन गरी परीक्षण भइरहेको छ । रिपोर्ट सोमबार साँझसम्म आइनसकेको संस्थानले जनाएको छ ।
संघीय स्वास्थ्य मन्त्री प्रदीप पौडेलले नारायणी अस्पताललाई हैजासहित झाडापखाला बिरामीको उपचार र प्रयोगशाला परीक्षण निःशुल्क गर्न निर्देशन दिएका छन् । उनले निजी अस्पतालहरूलाई पनि किट र औषधि उपलब्ध गराइने र विपद्को समयमा शुल्क नलिन आग्रह गरे ।
सरोकारवालाहरूले औषधि वितरणमा एकद्वार नीति अपनाउन र सरकारी स्वास्थ्य संस्थालाई उपचारको केन्द्र बनाउन सुझाव दिएका छन् । सरुवा रोग महाशाखाले हैजा पुष्टि भएकाले अब त्यस्तै लक्षण भएका बिरामीको परीक्षणमा समय खेर नगरी उपचारमा ध्यान दिनुपर्ने जनाएको छ ।
