काठमाण्डौ । प्रधानमन्त्री केपी शर्मा ओलीले हरितालिका तीजलाई व्रत, संयम र आत्मअनुशासनसँग गहिरो सम्बन्धित पर्वका रूपमा लिनुपर्ने बताएका छन् । तीज पर्वको अवसरमा शुभकामना सन्देश जारी गर्दै उनले तीजलाई केवल गीत–नृत्यको पर्वका रूपमा बुझ्ने प्रवृत्तिप्रति असन्तुष्टि प्रकट गरे ।

उनका अनुसार प्राचीन कालमा पतिपत्नी दुवै जना सप्तऋषिको पूजा गर्दै व्रत बस्ने परम्परा रहेको थियो, तर समयक्रमसँगै महिलामात्र व्रत बस्ने प्रचलन बढेको हो । ओलीले तीजलाई संस्कृतिले आत्मिक शुद्धता र दाम्पत्य जीवन सुदृढीकरणको अवसरका रूपमा व्याख्या गरेको उल्लेख गर्दै पछिल्लो समय विज्ञानले पनि व्रतलाई शारीरिक स्वास्थ्यसँग जोड्न थालेको बताए ।

“संयुक्त परिवार संस्कृतिको सुगन्ध बोकेको हरितालिका तीजले सबैको जीवनमा आत्मीयता, दाम्पत्यमा उल्लास र समाजमा सौहार्द फैलाओस्,” भन्दै प्रधानमन्त्री ओलीले सबै दिदीबहिनीलाई मंगलमय शुभकामना दिए ।