
काठमाण्डौ – स्पेनिस ला लिगामा रियल मड्रिडले रियल ओभिडोमाथि ३–० को फराकिलो जित दर्ता गरेको छ। केलियन एमबाप्पेले दुई गोल र भिनिसियस जुनियरले एक गोल गर्दै टोलीलाई जित दिलाए। यो नतिजासँगै रियल मड्रिड अंक तालिकामा तेस्रो स्थानमा पुगेको छ।
ला लिगाका अन्य खेलमा भिल्लारियलले जिरोनालाई ५–० ले पराजित गर्दा रियल सोसिडाड र स्प्यानोलबीचको खेल २–२ को बराबरीमा टुंगियो। ओसासुनाले भ्यालेन्सियामाथि १–० को जित निकाल्यो। अंक तालिकामा भिल्लारियल, बार्सिलोना र रियल मड्रिड सबैको समान ६ अंक छ, जहाँ बार्सिलोना दोस्रो र रियल मड्रिड तेस्रो स्थानमा छन्।
इंग्लिस प्रिमियर लिगतर्फ एभर्टनले ब्राइटनलाई २–० ले हराउँदै पहिलो जित दर्ता गरेको छ। दुई खेलबाट ३ अंक जोडेको एभर्टन आठौँ स्थानमा छ भने ब्राइटन १ अंकसहित १८औँ स्थानमा छ। अन्य खेलमा म्यानचेस्टर युनाइटेड र फुलहम, क्रिस्टल प्यालेस र नटिङ्घम फरेस्टबीच १–१ को बराबरी भयो। आज राति लिभरपुल र न्युक्यासल आमनेसामने हुनेछन्। खेल नेपाली समयअनुसार राति १२:४५ बजे सुरु हुनेछ।