काठमाडौं । नेकपा एकीकृत समाजवादीले आज पार्टीको चौथो स्थापना दिवस विविध कार्यक्रम गरि देशभर मनाउँदैछ ।
पार्टीले सरसफाइ, वृक्षारोपण, रक्तदान, अन्तरक्रिया, स्मारिका विमोचन र शुभकामना आदानप्रदानलगायतका कार्यक्रम गरेर स्थापना दिवस मनाउन लागेको हो । काठमाडौँमा हुने केन्द्रीय कार्यक्रममा विभिन्न राजनीतिक दलका नेताहरूलाई निमन्त्रणा गरिएको छ ।
कार्यक्रममा अध्यक्ष माधवकुमार नेपालले नेपाली कम्युनिस्ट आन्दोलनको योगदानबारे प्रस्तुति दिनुहुनेछ । त्यस्तै अन्य नेताहरूले वामपन्थी ध्रुवीकरण, वैचारिक विचलन र मुलुकको राजनीतिक अवस्थाबारे समीक्षा गर्ने प्रचार विभागका उपप्रमुख दामोदर अर्यालले जानकारी दिनुभयो ।
पार्टीले मातहतका सबै जिल्ला कमिटी, प्रदेश, स्थानीय तहका सङ्गठन र जनवर्गीय संस्थालाई दिवसको अवसरमा कार्यक्रम गर्न यसअघि नै निर्देशन जारी गरेको छ । तत्कालीन नेकपा एमाले सँग वैचारिक मतभेद भएपछि २०७८ साल भदौ ९ गते नेकपा एकीकृत समाजवादी स्थापना भएको थियो ।
