काठमाण्डौ – समाजवादी गणतन्त्र भियतनामकी उपराष्ट्रपति भो थि आन सुआन तीनदिने औपचारिक भ्रमणका लागि आज नेपाल आइपुगेकी छन्। उपराष्ट्रपति रामसहायप्रसाद यादवको निमन्त्रणामा उनी नेपाल भ्रमणमा आएकी हुन्।
त्रिभुवन अन्तर्राष्ट्रिय विमानस्थलको अति विशिष्ट कक्षमा उपराष्ट्रपति सुआनलाई परराष्ट्रमन्त्री डा. आरजु राणा देउवा र संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेसहित उच्चपदस्थ अधिकारीहरूले स्वागत गरेका थिए। यस अवसरमा नेपाली सेनाले गार्ड अफ अनर प्रदान गरेको थियो।
भ्रमणका क्रममा आजै सुआन र परराष्ट्रमन्त्री राणाबीच शिष्टाचार भेट हुने परराष्ट्र मन्त्रालयले जनाएको छ। उनी भदौ ९ गतेसम्म नेपालमै रहनेछिन्।
भियतनामतर्फबाट नेपालमा भएको यो पहिलो उच्चस्तरीय भ्रमण हो। यस क्रममा उपराष्ट्रपति यादव र सुआनबीच भदौ ८ गते प्रतिनिधिमण्डलस्तरीय वार्ता हुनेछ। साथै, उनले राष्ट्रपति रामचन्द्र पौडेल र प्रधानमन्त्री केपी शर्मा ओलीसँग पनि छुट्टाछुट्टै भेटवार्ता गर्ने कार्यक्रम छ।
यो भ्रमणलाई विशेष महत्त्वका साथ हेरिएको छ, किनकि यस वर्ष नेपाल र भियतनामबीच कूटनीतिक सम्बन्ध स्थापनाको ५०औँ वार्षिकोत्सव हो। भ्रमण सम्पन्न गरी उपराष्ट्रपति सुआन भदौ ९ गते स्वदेश फर्कने तालिका रहेको मन्त्रालयले जनाएको छ।
