काठमाडौं । सञ्चार तथा सूचना प्रविधिमन्त्री पृथ्वीसुब्बा गुरुङले उपसभामुख इन्दिरा रानालाई हटाउने विषयमा सत्ता गठबन्धनबीच सहमति नभएको बताउनुभएको छ । मन्त्री गुरुङले बाहिर हल्ला गरिएजस्तो उपसभामुख हटाउने सहमति भइनसकेको बताउनुभयो ।
पोखरामा आज आयोजित कार्यक्रममा सरकारका प्रवक्तासमेत रहेका गुरुङले सत्ता गठबन्धनमा सहमति भए मात्र उपसभामुख परिवर्तन गर्न सकिने जिकिर गर्नुभयो । उपसभामुख हटाउने चर्चा चल्दैमा आकाशै नखस्ने भन्दै उहाँले उपसभामुखले पदअनुकूल आचरण नगरेको विषयमा भने छलफल हुन सक्ने उल्लेख गर्नुभयो ।
अर्को प्रसंगमा मन्त्री गुरुङले सञ्चार तथा सूचना प्रविधि मन्त्रालयका कामलाई प्रभावकारी बनाउन मन्त्रालयसँग सम्बन्धित सबै कानुनलाई संशोधन गर्न लागिएको बताउनुभयो ।
उहाँले सोसल मिडियालाई सरकारले नियन्त्रण गर्न नभई नियमन गर्न खोजेको बताउनुभयो । साइबर अपराध विश्वको नै चुनौतीका रुपमा देखिएको भन्दै नेपालभित्र हुने साइबर अपराधलाई रोक्नका लागि सरकारले कानुन बनाउन खोजेको उल्लेख गर्नुभयो ।
