काठमाण्डौ – भारतले नेपालबाट थप ८० मेगावाट विद्युत् खरिद गर्न स्वीकृति दिएको छ। नेपाल विद्युत् प्राधिकरणका अनुसार, यसअन्तर्गत ४८.५ मेगावाटको मेवा खोला र ३१.४ मेगावाट क्षमताको करुवा सेती जलविद्युत् आयोजनाबाट उत्पादन हुने बिजुली भारत पठाइनेछ।

हालै भारतले २०० मेगावाट निर्यातका लागि अनुमति दिएको थियो भने बंगलादेशलाई पनि नेपालले ४० मेगावाट आपूर्ति गर्दै आएको छ। नयाँ स्वीकृतिसँगै भारततर्फको निर्यात १,१०० मेगावाट पुग्ने प्राधिकरणले जनाएको छ।

नेपाल र भारतबीच भएको द्विपक्षीय सम्झौता अनुसार यो मध्यम अवधिका लागि विद्युत् आपूर्ति हो, जसअन्तर्गत आगामी ३१ अक्टोबर २०२६ सम्म निर्यात गर्न पाइनेछ। वर्षायाममा नेपालले बिजुली बिक्री गर्ने र सुख्खायाममा आयात गर्ने प्रचलन रहँदै आएको छ।