काठमाण्डौ — पूर्वराष्ट्रपति विद्यादेवी भण्डारीले राजनीतिक दलहरूभित्र विकृति र विसंगति गहिरिँदै गएको आरोप लगाएकी छन् । बिहीबार राजधानीमा आयोजित एक कार्यक्रममा उनले वर्तमान राजनीतिक अभ्यासले सुशासन प्रवर्द्धन गर्न नसकेको र संसद् निरीह थलोमा परिणत भएको बताइन् ।
उनका अनुसार दलहरूले विकृति समाधान गर्ने क्षमता देखाउन सकेका छैनन् र राज्य संयन्त्रहरू समेत प्रणालीअनुसार सञ्चालन हुन नसकेको छ । "संसद् अहिले निरीह थलो बनेको छ, कानूनलाई समयानुकूल बनाउन गहिरो अध्ययन भएको छैन," भण्डारीले भनिन् ।
उनले ठूला दलहरूले आफैंले संविधान संशोधनको आवश्यकता रहेको सहमति गरे पनि त्यसबारे गहिरो छलफल अझै हुन नसकेको उल्लेख गरिन् । साथै, आरोप पुष्टि नभएसम्मै निर्वाचित जनप्रतिनिधिलाई निलम्बनमा पठाइने व्यवस्थाप्रति प्रश्न उठाउँदै उनले यसलाई लोकतान्त्रिक अभ्यासविरुद्धको कार्य भनेकी छन् ।
भण्डारीले नेपालमा शिक्षा क्षेत्रसमेत गम्भीर समस्यामा रहेको औंल्याउँदै समयमै सुधार नगरे अझै गहिरो संकट निम्तिन सक्ने चेतावनी दिइन् ।
