काठमाण्डौ — दार्चुलामा जिप दुर्घटना हुँदा एक गर्भवती महिलाको मृत्यु भएको छ भने नौ जना यात्रु घाइते भएका छन् । बिहीबार बिहान नौगाड गाउँपालिका–३ होपरीबाट होपरीगाडतर्फ गइरहेको सुपप्र–०४–००१ ज ०१०३ नम्बरको जिप भैरवधारमा दुर्घटनामा परेको हो ।
जिल्ला प्रहरी कार्यालय दार्चुलाका सूचना अधिकारी एवम् प्रहरी निरीक्षक छत्रबहादुर रावतका अनुसार दुर्घटनामा गम्भीर घाइते भएकी नौगाड गाउँपालिका–३ की २५ वर्षीया पार्वती टमटाको उपचारका क्रममा गोकुलेश्वर अस्पतालमा मृत्यु भएको हो ।
उक्त दुर्घटनामा अन्य तीन जना गम्भीर घाइतेको पनि सोही अस्पतालमा उपचार भइरहेको छ । गम्भीर घाइते हुनेहरूमा नौगाड गाउँपालिका–४ का २६ वर्षीया मोहन ठगुन्ना, मार्मा गाउँपालिका–५ की १७ वर्षीया अप्सरा महता र नौगाड गाउँपालिका–४ का ३५ वर्षीय उमेश ठगुन्ना रहेका छन् ।
यस्तै, नौगाड गाउँपालिका–४ की ४० वर्षीया रम्भा महता, ३४ वर्षीय उमेशसिंह ठगुन्ना, १२ वर्षीय राम महत, श्याम महता, १४ वर्षीया कान्छी महत, ७२ वर्षीया गम्बा महता र अपिहिमाल गाउँपालिका–४ की १९ वर्षीया लक्ष्मी कार्की सामान्य घाइते भएका छन् ।
चालक लाकेन्द्रसिंह ठगुन्नाले चलाएको जिप चिप्लो बाटोमा ब्रेक नलाग्दा सडकबाट करिब ७० मिटर तल खोलामा खसेको प्रहरीले जनाएको छ । दुर्घटनाग्रस्त गाडीमा ११ जना सवार थिए ।
