काठमाण्डौ – अष्ट्रेलियाको नर्दन टेरिटोरीमा जारी टप एण्ड टी–२० सिरिज मा नेपालले मेलबर्न रेनेगेड्स एकेडेमीलाई ३३ रनले हराउँदै लगातार दोस्रो जित दर्ता गरेको छ । यसअघि मंगलबार नेपालले होबर्ट हुरिकेन्स एकेडेमीलाई ६६ रनले हराएको थियो ।
डार्विनको पार्मस्र्टनस्थित काजालिस एरेनामा नेपालले दिएको १४० रनको लक्ष्य पछ्याउँदै रेनेगेड्स २० ओभरमै १०६ रनमा अलआउट भयो । विपक्षीका अर्जुन नायरले सर्वाधिक २६ रन जोडे भने जे लेमिरले १८ र ह्यारी डिक्सनले १६ रन बनाए ।
बलिङतर्फ नेपालका सोमपाल कामी चम्किए । उनले एक्लैले ५ विकेट लिए । कुशल भुर्तेलले २ विकेट लिए भने रुपेश सिंह, दीपेन्द्रसिंह ऐरी र शाहब आलमले समान १/१ विकेट हात पारे ।
यसअघि टस जितेर ब्याटिङ गरेको नेपालले २० ओभरमा ९ विकेट गुमाएर १३९ रन बनाएको थियो । कुशल मल्लले २२ बलमा २९ रन बनाए भने दीपेन्द्रसिंह ऐरीले २७ रन, लोकेश बमले २४ रन, भीम सार्कीले १७ रन तथा आरिफ शेख र रुपेश सिंहले समान १२ रनको योगदान दिए ।
रेनेगेड्सका बलर फर्गस ओनिल, लचलान बाङ्स, क्यालम स्टो र माइकल आर्चरले समान २/२ विकेट लिए ।
नेपालले यसअघि खेलेका चार खेलमध्ये तीनमा हार र एकमा जित निकालेको थियो । लगातार दोस्रो जितसँगै नेपालले आत्मविश्वास बढाएको छ । अब नेपालले भदौ ६ गते पाकिस्तान शाहीन्ससँग भिड्नेछ ।
