काठमाण्डौ – सेयर बजार मापक नेप्से परिसूचक बुधबार झन्डै दोहोरो अंकले घटेर २,७६७.२० विन्दुमा झरेको छ । अघिल्लो दिनको तुलनामा ९.७० अंक (०.३४ प्रतिशत) ले घटेपछि समग्र बजारमा नकारात्मक प्रभाव देखिएको हो ।

बुधबारको कारोबारमा १८८ कम्पनीको सेयर मूल्य घट्दा ५९ कम्पनीको मात्र बढ्यो भने २ कम्पनी स्थिर रह्यो । कारोबार घट्ने कम्पनीको संख्या बढी भएकाले परिसूचक झर्ने परिणाम आएको हो ।

सो दिन ५३ हजार ८५३ पटकको कारोबारमार्फत १ करोड ५२ लाख ६६ हजार ६१७ कित्ता सेयर किनबेच भएको छ । यसबाट कुल ५ अर्ब २० करोड रुपैयाँ बराबरको कारोबार भएको छ, जुन मंगलबारको ५ अर्ब ६३ करोड ६५ लाख रुपैयाँभन्दा कम हो ।

करोबारमा आएका १३ उपसमूहमध्ये होटल तथा पर्यटन र सामूहिक लगानी कोषबाहेक सबैको परिसूचक घटेकोमा पनि बजारलाई दबाब परेको देखिन्छ ।