काठमाण्डौ – पाकिस्तानमा निरन्तर भइरहेको मनसुनी वर्षाका कारण बुधबार मात्र २० जनाभन्दा बढीको ज्यान गएको छ । राष्ट्रिय विपद् व्यवस्थापन प्राधिकरण (एनडिएमए)का अनुसार गिलगिट–बाल्टिस्तानमा ११ र कराचीमा १० जनाको मृत्यु भएको हो । गत हप्तामात्रै बाढीले सिङ्गो गाउँ बगाउँदा ४०० जनाभन्दा बढीको मृत्यु भएको थियो ।

मौसम विभागले शनिबारसम्म थप वर्षा हुने पूर्वानुमान गरेको छ भने प्रभावित सहरका विद्यालय बन्द गरिएका छन् । सिन्ध प्रान्तका प्रमुख मौसमविद अमिर हैदर लघारीले बाढी र क्षतिको मुख्य कारण कमजोर पूर्वाधार भएको बताएका छन् । प्रान्तीय विपद अधिकारी मुहम्मद युनसका अनुसार दुई जिल्लामा ४० देखि ५० घर क्षतिग्रस्त भएका छन् ।

खैबर पख्तुनख्वा प्रान्तमा मात्र गत बिहीबारदेखि ३५० भन्दा बढीको ज्यान गइसकेको छ । सेनाले प्रभावित क्षेत्रमा राहत शिविर स्थापना गर्दै बेपत्ता व्यक्तिहरुको खोजी, स्वास्थ्य सहायता तथा खाद्यान्न वितरण कार्यलाई तीव्र पारेको एएफपीले जनाएको छ ।

अधिकारीहरूले सेप्टेम्बर मध्यसम्म मनसुनी वर्षा जारी रहने चेतावनी दिएका छन् । अहिलेसम्मको वर्षायाममा पाकिस्तानमा ७५० जनाभन्दा बढीको मृत्यु भइसकेको छ । सन् २०२२ मा आएको बाढीले मुलुकको एक तिहाइ भूभाग डुबाएर १,७०० जनाभन्दा बढीको ज्यान लिएको थियो ।