काठमाण्डौ नेपाली कांग्रेसको स्थानीय तह समन्वय विभागले सोमबार काभ्रेका बनेपा, पनौती र बेथानचोकमा अन्तरक्रिया गरी स्थानीय तहको कामकारबाही र कांग्रेस प्रतिनिधिहरूको भूमिकाबारे समीक्षा गरेको छ।

विभागका प्रमुख तथा केन्द्रीय सदस्य मधु आचार्य, सदस्यहरू बाबुकृष्ण सापकोटा र गीता सत्यालसहितको टोलीले कांग्रेसबाट निर्वाचित प्रतिनिधि र उम्मेदवारहरूसँग छलफल गरेको हो। विभागका अनुसार तीन वर्षअघिको निर्वाचनपछिका कामकारबाही, संकल्पपत्र कार्यान्वयनको अवस्था, सहकार्य र समन्वय, र आन्तरिक असन्तुष्टि समाधानमा केन्द्रित भएर संवाद गरिएको थियो।

सत्यालले प्राप्त निष्कर्षलाई दस्तावेजीकरण गरी पार्टीलाई बुझाइने बताइन्। उनले स्थानीय तहमा समग्रमा सकारात्मक परिणाम देखिएको भए पनि पार्टीभित्रका समस्याले कतिपय चुनौतीहरू उत्पन्न गरेको उल्लेख गरिन्।

अन्तरक्रियामा बनेपाका मेयर शान्तिरत्न शाक्यले आफूले निरन्तर काम गरे पनि पार्टीभित्रै प्रचारप्रसारमा सहयोग नपाएको गुनासो गर्दै, पार्टी नेताहरूले कार्यशैलीमाथि प्रश्न उठाएकोप्रति असन्तुष्टि जनाए। उनले बनेपा उत्कृष्ट नगरपालिकाको घोषणा हुनु कामको प्रतिफल भएको बताए।

पनौतीका मेयर रामशरण भण्डारीले भने सीमित स्रोत र साधनबीच धेरै काम भएको उल्लेख गर्दै संघीय र प्रदेश सरकारले आवश्यक सहयोग नगरेको गुनासो गरे। उनका अनुसार बाढीले सम्पदा र सांस्कृतिक पहिचानमा ठूलो क्षति पुर्याएको र पुनःजीवित पार्न चुनौतीपूर्ण भएको छ।

विभागले स्थानीय तहका उपलब्धिहरूलाई प्रचारप्रसार गर्न पत्रकारलाई समेत साथमा लगाउने गरेको र आगामी दिनमा सबै स्थानीय तहमा समन्वय तथा सहजीकरण समिति गठन गर्नुपर्ने आवश्यकता औंल्याएको छ।