काठमाण्डौ – सत्तापक्षले उपसभामुख इन्दिरा रानालाई पदच्युत गर्ने तयारी गरेको भन्दै प्रमुख विपक्षी दलहरूको बैठकले उक्त कदम असफल पार्न एकजुट हुने निष्कर्ष निकालेको छ। नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ को आह्वानमा बसेको बैठकमा एमाले र कांग्रेसले खाली कागजमा हस्ताक्षर अभियान चलाएपछि आपत्कालीन छलफल गरिएको हो।
बैठकपछि माओवादी केन्द्रका वरिष्ठ उपाध्यक्ष नारायणकाजी श्रेष्ठले उपसभामुखलाई हटाउने प्रक्रिया संवैधानिक परिषद्मा बहुमत जुटाएर पदाधिकारी नियुक्त गर्ने रणनीतिको हिस्सा भएको आरोप लगाए। उनले भने, “यो निरंकुशता र दुराशयको अभिव्यक्ति हो, जसले लोकतन्त्रकै धज्जी उडाएको छ।”
श्रेष्ठका अनुसार सरकारले चालेको कदमले मुलुकलाई संकटतर्फ धकेलिरहेको छ। लोकतान्त्रिक उपलब्धिको संरक्षणका लागि सबै दलहरू निहित स्वार्थभन्दा माथि उठेर एकजुट हुनुपर्ने उनले आह्वान गरे।
बैठकले उपसभामुख हटाउने प्रयासको विरोध गर्दै यसलाई असफल पार्न संबंधित सबै शक्तिलाई साथ दिन आह्वान गर्ने निर्णय गरेको छ।
