काठमाण्डौ – उपप्रधानमन्त्री तथा शहरी विकास मन्त्री प्रकाशमान सिंहले सिंहदरबारभित्र निर्माणाधीन संसद भवनको काम तोकिएको कार्यतालिका अनुसार अघि बढाउन निर्देशन दिएका छन्।
मंगलबार मन्त्रालयमा निर्माण कम्पनीका प्रतिनिधिहरूलाई बोलाएर सिंहले संसद भवनसम्बन्धी काममा ढिलाइ देखिएको भन्दै तत्काल सुधार गर्न आग्रह गरेका हुन्। उनले भने, “संसद भवनमा सबैको चासो जोडिएको छ, कुनै हालतमा काम रोकिँदैन, तालिकाअनुसार निरन्तर अघि बढाउनुपर्छ।”
उपप्रधानमन्त्री सिंहले मन्त्रालयकै प्रदर्शनमा संसद भवनको ढिलाइले प्रश्न उठाएको भन्दै समस्या आएमा मन्त्रालयले समन्वय गर्ने तर काममा आलटमल सह्य नहुने स्पष्ट पारे। साथै, उनले निर्माण कम्पनीलाई नियमित प्रगति विवरण पेश गर्न र भवन विभागलाई अनुगमन कडाइका साथ गर्न निर्देशन दिएका छन्।
बैठकमा मन्त्रालयका सचिव, भवन विभागका महानिर्देशक, विशेष भवन आयोजना प्रमुख, कन्सल्टेन्ट र निर्माण व्यवसायी सहभागी थिए। विशेष भवन आयोजना प्रमुख सहसचिव सुनिल ठाकुरले हालसम्मको प्रगतिबारे जानकारी दिँदै बाटो, वाटर ट्रिटमेन्ट प्लान्ट, स्यानेटरी, आन्तरिक सजावट र कन्फरेन्सिङ जस्ता काम अझै बाँकी रहेको बताए।
निर्माण व्यवसायीहरूले आवश्यकभन्दा कम कामदार प्रयोग भएको र तालिका अनुसार काम नभएको असन्तुष्टि जनाए पनि तोकिएको समय अर्थात् पुसको अन्तिम साताभित्र भवन सम्पन्न गर्ने प्रतिबद्धता व्यक्त गरेका छन्।
