काठमाण्डौ – अमेरिकी राष्ट्रपति डोनाल्ड ट्रम्पले युक्रेनी राष्ट्रपति भोलोदिमिर जेलेन्स्कीसँगको भेटअघि युद्ध तत्काल अन्त्य गर्ने वा निरन्तर जारी राख्ने निर्णय युक्रेनकै हातमा रहेको बताएका छन्।
सन् २०१४ मा ओबामा प्रशासनको समयमा भएको क्रिमियाको विलयलाई स्मरण गर्दै ट्रम्पले युक्रेन नाटोमा प्रवेश गर्ने विषय असम्भव भएको पुनः स्पष्ट पारे। उनले आफ्नै सामाजिक सञ्जाल ट्रुथ सोसल मा लेख्दै भने, “क्रिमिया फर्किँदैन, युक्रेन नाटोमा पनि प्रवेश गर्ने छैन, केही कुरा कहिल्यै परिवर्तन हुँदैनन्।”
जेलेन्स्कीले वासिङ्टन आइपुगेपछि भने, “हामी कुनै भूमि त्याग्दैनौँ। युक्रेनी जनता आफ्नो स्वतन्त्रता र भूमिकाको लागि लडिरहेका छन्।” उनले डोनेट्स्क र सुमीमा सेनाको प्रगतिबारे जानकारी दिँदै अमेरिका तथा साझेदार राष्ट्रप्रति आभार प्रकट गरे।
ट्रम्प–जेलेन्स्कीको भेट हालै अलास्कामा ट्रम्प र रुसी राष्ट्रपति भ्लादिमिर पुटिनबीच भएको तीन घण्टा लामो वार्तापछि तय भएको हो। त्यसपछि ट्रम्पले युद्ध अन्त्य गर्ने सर्वोत्तम बाटो स्थायी शान्ति सम्झौता भएको बताए।
अमेरिकी विदेशमन्त्री मार्को रुबियोका अनुसार, राष्ट्रपति ट्रम्पले अलास्काबाट फर्केपछि जेलेन्स्की र युरोपेली नेताहरूसँग गहिरो छलफल गरेका थिए। उनले रुसका मागलाई अस्वीकार्य बताउँदै, “हामी युक्रेनलाई दबाब दिँदैनौँ,” भने।
वासिङ्टनमा हुने बैठकमा फ्रान्स, जर्मनी, बेलायत, इटाली, फिनल्यान्डका नेता, युरोपेली आयोगकी अध्यक्ष उर्सुला भोन डेर लेयन र नाटो महासचिव मार्क रुट समेत सहभागी हुने छन्।
फ्रान्सेली राष्ट्रपति इमानुएल म्याक्रोनले युरोपको सुरक्षासहित युक्रेनको हितलाई प्राथमिकता दिने स्थायी शान्ति आवश्यक रहेको बताए। जर्मन चान्सलर फ्रेडरिक मेर्ज र बेलायती प्रधानमन्त्री किर स्टार्मरले पनि युक्रेनको न्यायपूर्ण र दीर्घकालीन शान्तिको चाहनालाई समर्थन गरेका छन्।
