काठमाण्डौ – विदेश जाने यात्रुहरूले त्रिभुवन अन्तर्राष्ट्रिय विमानस्थलको अध्यागमन जाँचमा कम्तीमा एक घन्टा अगाडि पुग्नुपर्ने व्यवस्था लागू गरिएको छ। विभागका महानिर्देशक रामचन्द्र तिवारीका अनुसार, अन्तिम समयमा यात्रुको चाप हुँदा कागजात परीक्षणका लागि पर्याप्त समय नहुने भएकाले यो कदम उठाइएको हो।

विशेषगरी रातको समयमा खाडी मुलुक जाने यात्रुमा यो समस्या बढी देखिएको उनले बताए। “अन्तिम समयमा जाँच गर्दा डेस्क अफिसरलाई समेत कठिनाइ हुने भएकाले कडाइ गरिएको हो,” उनले अनलाइनखबरसँग भने। विमानस्थल अध्यागमन विभागले विमानस्थलमा खटिने सबै एयरलाइन्स कम्पनी तथा सरोकारवाला निकायसँग छलफल गरी निर्णय लिएको हो।

यस्तै, विमानस्थलमा रातको समयमा यात्रु चाप हुने भएकाले नागरिक उड्डयन प्राधिकरणलाई उडान तालिम लचिलो बनाएर सञ्चालन गर्न सुझाव दिइएको छ। विगतमा विमानस्थल अध्यागमनका कर्मचारीको मिलेमतोमा नेपाली युवालाई असुली गरेर पठाउने गिरोहसम्बन्धी अख्तियार छानबिनमा लागेको थियो। तत्कालीन विमानस्थल प्रमुख सहसचिव पक्राउ परेपछि नेतृत्व परिवर्तन गरिएको थियो। तर, भिजिट भिसामा असुली गर्ने समस्या जारी रहँदा गृह मन्त्रालयले यस विषयमा नयाँ नेतृत्व नियुक्त गरेको छ।