काठमाण्डौ – रुपन्देहीका पर्यटन व्यवसायी, उद्योगी तथा सरोकारवालाले प्रधानमन्त्री केपी शर्मा ओलीको आसन्न भारत भ्रमणका क्रममा भैरहवास्थित गौतमबुद्ध अन्तर्राष्ट्रिय विमानस्थल सञ्चालनको मुद्दालाई प्राथमिकताका साथ उठाउन माग गरेका छन्।
संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेसमक्ष व्यवसायीहरूले विमानस्थललाई आवश्यक हवाई रुट अनुमति तथा इन्ट्रुमेन्टल ल्यान्डिङ सिस्टम (आईएलएस) सञ्चालनका विषयलाई भ्रमणको एजेन्डामा समेट्न आग्रह गरेका हुन्।
होटल एसोसिएसन नेपाल लुम्बिनी प्रदेश अध्यक्ष चन्द्रप्रकाश श्रेष्ठले विमानस्थल सञ्चालनमा भारतले अवरोध पुर्याइरहेको भन्ने हल्ला भएकाले प्रधानमन्त्रीको भ्रमणले यसबारे प्रष्टता दिनुपर्ने बताए। उनले भैरहवाबाट काठमाडौंसम्म डेलिगेसन पुग्ने तयारी भइरहेको जनाउँदै भारतकै कारण देखिएका अप्ठ्याराहरू समाधान गर्न जोड दिए।
पर्यटन व्यवसायी आशा गुरुङले विमानस्थल तत्काल सञ्चालन नहुँदा लगानीकर्ताको भविष्य नै संकटमा परेको भन्दै प्रधानमन्त्रीले यसलाई प्रमुख विषय बनाउनुपर्ने बताए। भारतका विभिन्न सहरमा क्षेत्रीय उडानबाट भए पनि व्यवसायलाई बचाउनुपर्ने उनको माग थियो। अर्का व्यवसायी विष्णु शर्माले भारतको गोरखपुर विमानस्थलबाट दैनिक हुने उडानहरू प्रायः नेपाली यात्रुहरूले भरिने तथ्य प्रस्तुत गर्दै गौतमबुद्ध विमानस्थललाई पनि भारतसँगै जोड्न आवश्यक भएको बताए।
विमानस्थलका महाप्रबन्धक प्रताबबाबु तिवारीले तत्कालका लागि भारतका विभिन्न सहरमा क्षेत्रीय उडान सञ्चालन गरेर कनेक्टीभिटी बढाउन सकिने बताए। मन्त्री पाण्डेले समेत प्रधानमन्त्रीको भ्रमणमा प्रस्तुत हुने एजेन्डामा गौतमबुद्ध विमानस्थलका अन्तर्राष्ट्रिय उडानका लागि रुट अनुमति, भैरहवा–पोखरा विमानस्थलप्रति भारतको नकारात्मक दृष्टिकोण अन्त्य गर्ने र क्षेत्रीय उडान विस्तारको पहल गर्ने विषय समेटिएको जानकारी दिए।
