काठमाण्डौ – नेकपा एकीकृत समाजवादीले नेकपा माओवादी केन्द्रसँग तत्काल पार्टी एकता नगर्ने निर्णय गरेको छ। शुक्रबार बसेको सचिवालय बैठकले एकातर्फ माओवादीसँग मात्र मिल्दा उल्टै क्षति हुने निष्कर्ष निकालेको हो भने अर्कातर्फ व्यापक वाम एकताको आवश्यकता औंल्याएको छ।
बैठकमा अध्यक्ष माधवकुमार नेपाल, सम्मानित नेता झलनाथ खनाल, उपाध्यक्ष जगन्नाथ खतिवडा, प्रकाश ज्वालालगायत नेताहरूले धारणा राखेका थिए। खनालले “अहिल्यै एकता सम्भव छैन, हामी अझै संस्थागत रूपमा पूर्ण तयार भइसकेका छैनौँ,” भन्दै कार्यगत सहकार्यलाई प्राथमिकता दिनुपर्ने बताए।
उपाध्यक्ष खतिवडाले समेत माओवादीसँग एकता गर्दा संगठन झन् कमजोर हुने चेतावनी दिए। उनका अनुसार, “अन्तरविरोधले ग्रस्त दलसँग मिल्दा लाभभन्दा हानि धेरै हुन्छ, कार्यकर्ताको भावना अनुसार निर्णय गर्नुपर्छ।”
बैठकमा अधिकांश नेताहरूले हतारमा एकता नगरी वैचारिक, सैद्धान्तिक र संगठनात्मक आधारमा मात्रै सहमति गर्नुपर्नेमा जोड दिएका थिए। उपाध्यक्ष तथा प्रवक्ता प्रकाश ज्वालाले “एकतामा जल्दबाजी गर्दा टिकाउ हुँदैन, समाजवादी मोर्चाका सबै दलसँग समन्वय गरेर मात्र परिपक्व एकता गर्नुपर्छ” भने।
अध्यक्ष नेपालले पनि तत्काल एकताको नभई कार्यगत सहकार्यबारे प्रचण्डसँग कुरा भइरहेको स्पष्ट पारे। उनका अनुसार, एकता अघि बढाउन विचार, सिद्धान्त, कार्यक्रम र एजेन्डामा स्पष्ट सहमति आवश्यक छ।
बैठकले अब समाजवादी मोर्चाभित्रका दलहरूसँग मात्र नभई अन्य वामपन्थी दलहरूसँग पनि संवाद अघि बढाउने निर्णय गरेको छ। औपचारिक निष्कर्ष भने आगामी भदौ २५ गते बस्ने केन्द्रीय समितिबाट आउने बताइएको छ।
