काठमाडौं । नेपाल प्रहरी प्रधान कार्यालयले ‘युनिसेक्स सैलुन’ सञ्चालनमा ल्याएको छ । प्रहरी कर्मचारीहरुको सहजताका निम्ति मुख्यालय परिसरमा ‘युनिसेक्स सैलुन’ खोलिएको हो ।

प्रहरी महानिरीक्षक (आइजीपी) दिपक थापाले उद्घाटन गरेसँगै सेवा शुरु भएको छ । थ्रेडिङ्ग,फेसियल,हेयर कट, केराटिनलगायत सबै सेवा प्रहरी कर्मचारीलाई सर्वसुलभ मूल्यमा उपलब्ध हुने मुख्यालयले जनाएको छ ।

मुख्यालयका अनुसार सैलुनमा सबै सेवाहरु बाहिरभन्दा आधा शुल्कमा पाइनेछ । सँगै त्यसबाट केही रकम प्रहरी कल्याणकारी कोषमा पनि जानेछ । मुख्यालयले सामानको मूल्य,ज्याला र कोषमा जाने रकम जोडेर सेवा शुल्क निर्धारण गरिदिएको छ ।

पुरै अनुहारको थ्रेडिङ्ग गरेको एक सय रुपैयाँ शुल्क निर्धारण गरिएको छ । मुख्यालयका अनुसार त्यसमध्ये ५० रुपैयाँ सामानको मूल्य र ३० रुपैयाँ ज्याला हो । २० रुपैयाँ प्रहरी कल्याण कोषमा जान्छ ।

फेसियल क्लिन्जिङ्ग गरेको १ सय ६५ रुपैयाँ , फेसियल किटबक्सको ५ सय ३५ रुपैयाँ शुल्क तोकिएको छ । पुरुष प्रहरीको कपाल काटेको, धोएको र दारी खौरिएको १ सय २० रुपैयाँ तोकिएको छ ।

महिलाको आधुनिक हेयर कट गरेको १२०, सामान्य काटेको एक सय, कर्ली गरेको एक सय, स्थायी केराटिन र केराटिन बोटोक्सको एक हजार ५ सय , केराटिन स्मुथिङको एक हजार ४ सय रुपैयाँ रहेको छ ।

कलर गरेको ९ सय ५०, हाइलाइट र कलर ब्लिच गरेको एक हजार, सामान्य मेकअपको ५ सय, पार्टी मेकअपको एक हजार, सामान्य हेयर डिजाइनको ७० रुपैयाँ निर्धारण गरिएको छ । समय अनुसार मूल्य परिवर्तन हुने जनाइएको छ ।