सरकारले नेपालमा नै पहिलो पटक गाडी गुड्ने नागढुंगा–नौबिसे सुरुङ मार्गमा गाडी र बाइक सञ्चालन गर्दा लाग्ने शुल्क तोकेको छ । सुरुङ मार्गबाट गाडी काठमाडौं आउँदा र काठमाडौंबाट फर्किदा फरक फरक शुल्क निर्धारण गरिएको छ ।
सवारी अनुसार ६५ रुपैयाँदेखि ६ सयसम्म शुल्क तोकिएको छ । कार र भ्यानहरूले काठमाडौँ आउँदा ६५ रुपैयाँ र जाँदा ६० रुपैयाँ शुल्क तिर्नुपर्नेछ । मिनी बस÷ट्रकको काठमाडौं आउँदा १ सय १५ रुपैयाँ र काठमाडौंबाट फर्किँदा ८० रुपैयाँ दस्तुर लाग्नेछ । ठुला बस तथा ट्रकको आउँदा २ सय ६० र जाँदा २ सय रुपैयाँ लाग्ने छ ।
भारी सवारीले भने सुरुङ मार्गबाट काठमाडौं आउँदा ६ सय र काठमाडौंबाट फर्किदा २५० रुपैयाँ सरकारलाई बुझाउनु पर्नेछ । सुरुङ मार्गमा बाइक, ग्यास बुलेट, डिजेल पेट्रोल र सुरक्षाका लागि चुनौती हुने गाडी गुड्न पाउने छैनन् । सुरुङ मार्गको काम ९४.५ प्रतिशत सम्पन्न भइसकेको छ । कार्तिकमा काम सम्पन्न भए पनि सुरुङ मार्गको सुरक्षा सम्बन्धी तालिम गरेपछि आगामी पुसबाट सञ्चालन ल्याउने सरकारको तयारी छ ।
सुरुङ्गमार्ग केपी शर्मा ओलीले प्रधानमन्त्री हुँदा २०७६ कात्तिक ४ मा शिलान्यास गरेका थिए । शिलान्यास भएको ४२ महिनामा निर्माण सम्पन्न गर्ने भनिएपनि अझै सकिएको छैन । सुरुङमार्गमा सुरुङ र सडक गरी कुल ५.१३ किलोमिटर लामो तीन लेनको हुनेछ ।
उपत्यका प्रवेश गर्ने सवारीसाधन दुई लेनबाट यात्रा गर्नेछन् भने बाहिरिने सवारीसाधन एक लेनबाट जाने छन् । सुरुङमार्ग बनेपछि नौबिसे–थानकोटको झण्डै ८ किलोमिटर बाटो छोटिने छ भने झण्डै ३० मिनेट समय बच्ने अपेक्षा गरिएको छ । सुरुङ मार्ग २२ अर्ब रुपैयाँमा जापानी कम्पनी हाज्मा–आन्द्रो जेभीले बनाएको हो । जापान सरकारको करिब १६ अर्ब रुपैयाँ सहुलियतपूर्ण कर्जामा बाकी रकम नेपाल सरकारले थपेको हो ।
