काठमाडौं । नेकपा एमाले कोशीको बैठकमा नाम टिपाएका नेताहरूले बोल्न नपाएको गुनासो आइरहेको बेला प्रदेश कमिटी अध्यक्ष घनश्याम खतिवडाले अपानीको बर्खिलाप हुने गरी बोल्न नदिएको प्रष्टीकरण दिएका छन् ।
‘पार्टी बैठकमा ४२ जना कमरेडहरूले बोल्नु भयो । केही कमरेडहरूले पार्टी केन्द्रको निर्णय र अपानी १२ को बर्खिलापमा छलफल गर्न खोज्नुभएको थियो ’ खतिवडाले भने, ‘एमालेमा उपल्ला कमिटीको निर्णयका विषयमा तल्ला कमिटीमा छलफल हुँदैन । तल्ला कमिटीको काम केन्द्रको निर्णय कार्यान्वयन गर्ने हो ।
त्यही कारणले केही साथीहरूले बोल्ने समय पाउनु भएन । ’ धनकुटाको हिलेस्थित होटल काञ्जिरोवा होटलमा मंगलबार र बुधबार २ दिन चलेको बैठकको अघिल्लो दिन अन्तिमतिर केही नेताले पूर्वराष्ट्रपति विद्यादेवी भण्डारीलाई निषेध गर्ने पार्टीको निर्णय सच्याउन ध्यानाकर्षण गराएका थिए । प्रत्येकलाई ३ मिनेटको समय छुट्याइएको थियो ।
बुधबार बोल्न नाम टिपाएकाहरूलाई लिखित सुझाव दिन भनेर एकैपटक स्थायी कमिटी सदस्यबाट मन्तव्य सुरू गरिएको सहभागी एक नेताले बताए । प्रदेश सदस्यहरू रोशन बस्नेत, मोरङका डीबी कार्की, सुनसरीकी अञ्जु पाण्डेले विद्या भण्डारीलाई रोक्दा कार्यकर्तामा निराशा बढेको बताएका थिए ।
विद्याको गृहजिल्ला भोजपुरका अध्यक्ष मकर खड्काले पनि पूर्वराष्ट्रपतिको सदस्यता विवादको असर पार्टीको तल्लो तहसम्म देखापरेकाले यसले मिसन ८४ लाई नै असर पु¥याउन सक्नेतर्फ सचेत गराउँदै केन्द्रले चाँडै हल गर्नुपर्ने बताएका थिए । विधान महाधिवेशन समेट्नु पर्ने विभिन्न विषयमा सुझाव संकलन गर्न प्रदेशले सचिव राजकुमार भण्डारीको संयोजकत्वमा १० सदस्यीय कार्यदल बनाएको छ ।
