काठमाडौं । नेपाली कांग्रेसका सभापति शेरबहादुर देउवाले डिजिटल प्लेटफर्ममा देखिएका असुरक्षाका विषयमा समयमै आवश्यक नीति र कानुन निर्माण गर्नु पर्ने बताउनु भएको छ ।
डिजिटल प्लेटफर्ममार्फत नागरिक असुरक्षित हुने समस्याको समाधानका लागि नीति र कानुन निर्माणमा ढिलाई भएको बताउनु भएको हो । उहाँले डिजिटल प्लेटफर्महरूले नेपाललाई विश्व समुदायसँग जोड्ने काम गरेको भएपनि उत्पन्न समस्याहरूको समाधान र व्यवस्थापनका लागि आवश्यक कानुन र नीतिहरू ल्याउनु पर्ने जिकिर गर्नुभयो ।
अहिलेको युग डिजिटल युग भएको भन्दै उहाँले सबै मिलेर प्रविधिमैत्री, नवप्रवर्तनशील र समृद्ध डिजिटल नेपाल निर्माणमा लाग्न आव्हान गर्नु भयो । पार्टीको सूचना, संचार तथा प्रचार विभागले सानेपामा आज गरेको डिजिटल प्लेटफर्मको प्रयोग, प्रभाव र असर विषयक कार्यक्रमको उद्घाटन गर्दै सभापति देउवाले डिजिटल प्लेटफर्ममा देखिएका नागरिक असुरक्षित हुने समस्याहरूको समाधानका लागि सरकार र सरोकारवाला निकायहरूले समयमै ध्यान दिन जोड दिनुभयो ।
