काठमाडौं । अमेरिकी सहयोग नियोग मिलेनियम च्यालेन्ज कर्पोरेसन (एमसीसी)को अनुदान सहयोगमा बन्ने दुई खण्डको ठेक्कामा आज सम्झौता भएको छ ।
एमसीसीअन्तर्गत निर्माण हुने २९७ किलोमिटर ४०० केभी डबल सर्किट प्रसारणलाइन मध्येको दुई खण्ड निर्माणका लागि छुट्टा छुट्टै ठेक्का सम्झौता भएको हो । नुवाकोटको रातमाटे–नयाँ दमौली प्रसारणलाइन निर्माण र दमौली–नयाँ बुटवल प्रसारणलाइन निर्माणका लागि ठेक्का सम्झौता भएको एमसीए नेपालले जनाएको छ ।
प्रसारणलाइन एन्जेलिक–स्किपर जेभीसँग नुवाकोटको रातमाटे–नयाँ दमौली बनाउन ७ करोड ७४ लाख ८० हजार अमेरिकी डलरमा ठेक्का सम्झौता भएको हो । त्यस्तै, दमौली–नयाँ बुटवल प्रसारणलाइन निर्माण गर्न वाइबा–सलसार जेभीसँग सात करोड ७० लाख ३० हजार अमेरिकी डलरमा सम्झौता भएको एमसीएद्वारा जारी विज्ञप्तीमा उल्लेख छ ।
दुवै खण्ड निर्माण भएपछि विद्युत् प्रसारणमा नेपालकालागि ठूलो फड्को हुनेछ ।
