काठमाडौं — जनमत पार्टीले पार्टीका राष्ट्रिय उपाध्यक्ष तथा अनुशासन विभाग प्रमुख इञ्जिनियर दीपक कुमार साहलाई साधारण सदस्य पदसमेत नरहने गरी निष्कासन गरेको छ। पार्टीका अनुसार साहले संगठनात्मक जिम्मेवारीलाई प्राथमिकतामा नराखी अनुशासनविपरीत गतिविधि गर्दै आएको प्रमाणित भएपछि कारबाही गरिएको हो।

पार्टीद्वारा जारी विज्ञप्तिमा साह पार्टीको स्थायी समिति सदस्यजस्तो उच्च पदमा रहे पनि पार्टी कार्यप्रति उदासीन रहेको, आफ्नो रोजगारी त्याग्न नसकेर पूर्णकालीन रूपमा संलग्न नहुनुका साथै चुनावमा समेत सक्रिय सहभागिता नजनाउनु आरोप लगाइएको छ। पछिल्लो समय साह बाह्य स्वार्थका आधारमा पार्टीभित्र विभाजन ल्याउने, नेताकार्यकर्ताबीच भ्रम फैलाउने र संगठन कमजोर पार्ने काममा संलग्न रहेको दाबी गरिएको छ।

विज्ञप्तिमा हाल पार्टी र नेतृत्वविरुद्ध विभिन्न स्वार्थी समूहले मधेशको अधिकार, न्याय र समावेशी परिवर्तनको मुद्दा कमजोर पार्ने षड्यन्त्र गरिरहेको उल्लेख छ। त्यसका लागि आन्तरिक गुटबन्दी, अविश्वास र द्वेष फैलाउने प्रयास भइरहेको जनाइएको छ।

जनमत पार्टीले लोकतन्त्र र अनुशासनलाई समान रूपमा महत्व दिनुपर्नेमा जोड दिँदै, पार्टीविपरीत गतिविधिमा लाग्ने जो कोहीमाथि आवश्यक कारबाही गरिने चेतावनी दिएको छ। अध्यक्ष डा. सीके राउतको नेतृत्वमा पार्टी सही दिशामा अघि बढिरहेको भन्दै, अफवाह वा भ्रममा नपरी संगठनात्मक कार्यमा समर्पित रहन कार्यकर्ता तथा समर्थकहरूलाई अपिल गरिएको छ।