काठमाण्डौ। नेकपा माओवादी केन्द्रका अध्यक्ष एवं पूर्वप्रधानमन्त्री पुष्पकमल दाहाल ‘प्रचण्ड’ले राज्य व्यवस्था तथा सुशासन समितिका सभापति रामहरि खतिवडालाई पदमा बस्ने नैतिक अधिकार नभएको स्पष्ट रूपमा बताएका छन्।

अखिल क्रान्तिकारीले आयोजना गरेको शैक्षिक संवाद कार्यक्रममा बोल्दै प्रचण्डले भने, “नैतिक रूपमा उहाँले सभापतिमा बस्ने आधार छैन। राजीनामा दिएर आफ्नो राजनीतिक छवि जोगाउनु नै उपयुक्त हुन्छ, जबरजस्ती गरियो भने त्यो गल्ती हुनेछ।”

कुलिङ पिरियड अवधिमा संसदमा भएको कथित छेडखानी प्रकरणको सन्दर्भमा प्रचण्डले थपे, “समितिको गल्ती स्वीकार गर्दै राष्ट्रिय सभालाई चिठी पठाइएको छ, त्यसैले यसको नैतिक जिम्मेवारी अब केवल समितिमा सीमित नरही सिङ्गो संसदमै सोझिएको छ।”

उनका अनुसार राज्य व्यवस्था समितिका सदस्यमात्र होइन, सम्पूर्ण सांसदहरूले नैतिक बोझ अनुभूति गर्नुपर्ने अवस्था आएको छ। समितिले गल्ती स्वीकार गरिसकेको अवस्थामा सभापतिले अझै पनि पद नछाड्नु उचित नहुने स्पष्ट संकेत उनले दिएका छन्।

प्रचण्डको अभिव्यक्तिलाई दलभित्रैबाट सार्वजनिक रूपमा भएको कडा आलोचना र आन्तरिक दबाबको संकेतका रूपमा विश्लेषण गरिएको छ।